News-Details

Indrez tecnic gie – sviament na

16.05.2019

DA HANS HUONDER / ANR

La regenza ei promta d’examinar pusseivladads per migliurar la segirtad dalla via
cantunala denter Sumvitg e Mustér.
La necessitad ei dada, surtut pil temps cun bia neiv. Ina
pussei vladad ei d’endrizzar in sistem automatic da siglientar lavinas ella Val Lumpegna. In auter
ina survigilonza da radar per la Val S. Placi. Negina pusseivladad vesa la regenza il mument per in project da sviament pil vitg da Mustér. In tal ha deputau Clemens Berther proponiu en si’incumbensa alla regenza. Tenor la regenza existan il mument biars giavischs per sviar il traffic da transit ord il territori habitau, aschia ch’ei ha num tschentar prioritads. La Via sursilvana denter Sumvitg e Mu stér sto adina puspei vegnir serrada pervia dil prighel da lavinas. Cheutras ein las vischnauncas da Mustér, Medel e Tujetsch allura isoladas, surtut era il mument ch’in scamond da carrar pertucca era la lingia dalla Viafier retica.

Il fevrer ha deputau Clemens Berther inoltrau alla regenza in’incumbensa concernent ina migliur dalla segirtad sil tschancun dalla via cantunala denter Sumvitg e Mustér. Il motiv: Igl unviern ei la via adina puspei serrada pervia dil prighel da lavinas, surtut pervia digl intschess dalla Val Lumpegna e dalla Val S. Placi. Ferton ch’ei dat ella Val Lumpegna gia in indrez d’alarm en cass ch’ina lavina vegn en moviment exista in tal sistem buc ella Val S. Placi. Aschia sa ei capitar che la via sto vegnir serrada per entginas uras entochen entirs dis, sco igl ei era stau il cass igl unviern vargau. Per part ei lu era la viafier pertuccada da quellas mesiras. Pertuccadas ein lu denter 5000 e 15 000 persunas sisum la Surselva. Sin fundament da quella situaziun ha Clemens Berther suttamess igl unviern vargau pliras damondas alla regenza: Da sclarir la pusseivladad d’installar indrezs automatics da siglientar lavinas ella Val Lumpegna e d’endrizzar in sistem da survigilonza cun agid da radar ella Val S. Placi. Plinavon ch’in eventual sviament pil vitg da Mustér vegni planisaus, aschia ch’il prighel da lavinas per quel egl intschess dalla Val S. Placi sappi vegnir reducius sin in minimum. En quei connex propona el in tunnel sco sviament.

Problems ein enconuschents
La regenza ei cunscienta dall’impurtonza dalla Via sursilvana H19 per l’avertura dalla Surselva – en special per las vischnauncas dalla regiun Sursassiala – sco era dils pass dall’Alpsu e dil Lucmagn. Dapi igl onn 2013 ei il tschancun denter Sumvitg e Mustér staus serraus en tut 45
uras. Parallelmein sper l’incumbensa da Berther sustegnan era las vischnauncas da Tujetsch, Mustér, Medel, Trun e Sumvitg explicitamein l’examinaziun da mesiras architectonicas per migliurar la situaziun dalla segirtad. En sia risposta sin l’incumbensa communichescha la regenza
ch’ella seigi promta da sclarir las pusseivladads per indrezs fixs per siglientar lavinas ella Val Lumpegna. Cun quei savess la segirtad vegnir migliurada leu vinavon suenter ch’ei exista ella val gia in indrez d’alarm ton pil traffic individual sco per la viafier. Medemamein ei la regenza promta da schar sclarir semegliontas mesiras per la Val S. Placi. Quellas duein vegnir coordinadas culs sclariments per la Val Lumpegna. Indrezs automatics per siglientar lavinas existan dil reminent gia en differents loghens dil cantun Grischun.

Tschentar prioritads
Per buca fetg realistics vesa la regenza il mument il project per in sviament dil vitg da Mustér, denter auter sco tunnel. El Grischun detti ei il mument numerus projects gronds per descargar il territori habitau dil traffic da transit. Culs mieds che stettien a disposiziun stoppi igl uffeci da construcziun bassa garantir en emprema lingia il manteniment dil menaschi dallas vias. Plinavon prender mesiras per mantener la substanzia architectonica dall’infrastructura pil traffic. Ina tiarza prioritad hagi l’adattaziun dall’infrastructura existenta al standard da norma hodiern per exempel concernent la segirtad dil traffic ni arisguard la capacitad. Cun tals mieds ei la via denter Rabius e Sumvitg ni denter la punt da Lumpegna e Mustér vegnida sanada e currigida ils davos onns. Tenor la regenza vegn ei era elavurau il mument projects pils tschancuns Cuas entochen la punt Lumpegna ni la colligiaziun d’Andiast entochen Tavanasa. Ils mieds finanzials restonts vegnan impundi en projects gronds, per exempel sviaments. Tenor las directivas dalla regenza duei vegnir realisau en quei connex mo in project per ina construcziun nova il medem mument. Sco projects successurs dil sviament da Silvaplauna ch’ei vegnius aviarts la stad 2018 vegnan giudicai sco prioritars en special ils sviaments da La Punt, S. Maria en Val Müstair sco era Susch. Ultra da quei ein ulteriurs projects d’adattaziun gronds en elavuraziun. El rom dils mieds finanzials disponibels pon – ord veta dalla regenza – ulteriurs sviaments da vitgs vegnir projectai e realisai ils proxims onns quei mument ch’ils ulteriurs projects gia instradai ein avanzai. Per quei motiv ha in project per in sviament da Mustér – denter auter cun la ponderaziun da realisar in tunnel en quei connex – negina prioritad il mument.