News-Details

Mustér ha puspei plevon: Sur Mathew Kurian dall’India

16.07.2019

(anr/gc)

Quel ha surpriu la pastoraziun dalla pleiv da S. Gions cun l’entschatta da fenadur – suenter che quell’ei stada vacanta bunamein in onn. Igl antecessur, sur Georg Changeth, ch’ha bandunau Mustér igl uost digl onn vargau, fuva era in cumpatriot dil niev plevon. Sin il plevon indic suonda puspei in vischin da quella immensa tiara asiatica. Nus cartein al president dalla pleiv ch’ei seigi stau fetg stentus da survegnir in niev plevon en vesta alla scartezia da spirituals. La consequenza ei perquei stada la pli liunga «sedisvacanza» dalla pleiv da Mustér. Daco ein ins vegnius sin sur Mathew Kurian? El ei enconuschents in tec a Mustér dils onns 2007–2009 ch’el veva giu substituiu per in temps il plevon sur Alexi Manetsch. Vitier vegn ch’el ha gidau ora ella pastoraziun buc avon ton daditg ella pleiv dad Andermatt vi Ursera. Ed aschia han ins giu caschun da nuar ils emprems contacts. Alla fin da november 2018 ei sur Mathew vegnius eligius plevon da Mustér. El ha denton giu schau saver ch’el sappi surprender leu la pastoraziun pér il fenadur d’uonn. Uss eisi aschi lunsch. La pleiv ei satisfatga ed engra zieivla.

Il beinvegni a sur Mathew ei staus fetg cordials. Ins ha udiu e sentiu quei ed ei era staus surprius – sco il niev plevon en siu engraziament – dall’emperneivla e fetg cordiala recepziun tras la baselgiada. Sur Mathew deriva dil stadi federal indic da Kerala. El, ch’ei naschius 1970, ha d.a. era studegiau on Tiaratudestga e fatg leu all’Universitad dad Eichstätt il licenziat en teologia. 2001 eis el vegnius ordinaus spiritual, incardinaus ella diocesa da Puttur ell’India e staus engaschaus leu ton sco plevon e docent tochen ch’el ei arrivaus a Mustér. Sur Mathew plaida bein tudestg, mo ha era schau saver ch’el vegni adina a far dapli per romontsch el survetsch divin. In tec ei quei gia succediu tier la messa da beinvegni. In onn senza plevon ei buca stau lev. Perquei ha il parsura dalla pleiv engra ziau fetg als spirituals pensiunai sur Alexi Manetsch, sur Giusep Venzin ed al decan dalla claustra, pader Bruno Rieder, pils buns survetschs prestai, senza era emblidar catechets e catechetas. Suenter la messa da beneventaziun ha ei dau caschun da far in viva cul niev plevon a Sut Gliendas sper baselgia. Numerus han fatg quei demussond aschia ton simpatia sco engrazieivladad da finalmein puspei ver in plevon.