News-Details

Specialitads grischunas sin viadi

17.07.2019

Il viadi d’ina gruppa da berniers da Mustér a Vevey ha entschiet. La finamira ei la Fête
des Vignerons el cantun Vad nua ch’il Grischun ei cantun hospitont.
En connex cun las acziuns sut il tetel «Fiasta dils senns» da quest e l’auter onn el Grischun ein era pliras acziuns ordeifer il cantun previdas. Ina da quellas ei la participaziun alla Fête des Vignerons e cumbinada cun lezza ei in’acziun en fuorma d’in viadi cun cavals e méls dil Grischun entochen el cantun Vad. Quei viadi a pei en pliras etappas da Mustér entochen Brig e da leu cun vehichels ha entschiet ier. Ella cuort dalla claustra a Mustér ei la gruppa vegnida tarmessa sin viadi. Avat Vigeli Monn ha benediu las participontas, ils participonts ed ils animals ed il vicepresident dil cussegl grond, Alessandro Della Vedova, ha purtau ils salids dallas autoritads cantunalas. Il meinaproject Philipp Bühler ha suttastrihau l’impurtonza d’in tal arranschament per propagar en ina fuorma extraordinaria ils products grischuns. Da vegl enneu seigi il Grischun enconuschents per sia tradiziun dils berniers. Jasmine Said Bucher d’Alpinavera constatescha ch’il Grischun ei tradiziunals en sias specialitads e tratgas, mo tonaton adina era aviarts per innovaziuns. Sin il liung viadi a Vevey transportescha la gruppa denter auter caschiel da munto gna, rosoli (Röteli), tuortas da nuschs e carn secca. Igl ei tut products certificai cun derivonza grischuna.

Ils proxims siat dis ei ina gruppa da berniers cun nov cavals, dus méls e products grischuns sin viadi atras plirs cantuns cun la finamira d’arrivar alla Fête des Vignerons a Vevey. Ils 23 da fenadur 2019 ei leu il di grischun. «graubündenVIVA» ei la marca pil meglier ch’il Grischun ha da porscher: Gaudi, culinarica e regiunalitad. Il program che cuoza dil matg 2019 entochen igl october 2020 meina atras igl entir cantun Grischun sco era en differents loghens dalla Svizra. «graubündenVIVA» ei in project singular en Svizra che duei mussar tgei che vegn tut produciu el Grischun, surtut en caussa nutriment. «La finamira da «graubündenVIVA» ei denter auter da derasar ils products grischuns ed aschia era da gidar a salvar il prezi per quels products certificai d’aulta qualitad», di il meinaproject Philipp Bühler. Il viadi dil Grischun cun ina gruppa da berniers entochen a Vevey duei esser in dils mussaments per l’autenticitad dils products grischuns.

Alla Fiasta dils senns
Suenter ch’ils arranschaments da partenza dalla Fiasta dils senns han giu liug ella capitala grischuna a Cuera e silsuenter a    Turitg suonda uss il viadi alla Fête des Vignerons. Quei viadi da berniers ei in    element dil program dil Grischun sco cantun hospitont alla fiasta che cuoza dils 18 da fenadur entochen ils 11 d’uost 2019 a Vevey. Il Grischun vul dar in accent a quella fiasta. Ils 23 da fenadur 2019 duei esser «in’jamna cantunala». Dapi ier sesanfla ina gruppa da berniers sut la direcziun digl anteriur giugadur da hockey sin glatsch, Reto Dürst, cun endisch animals da Mustér sin viadi a Brig. Ella transportescha products grischuns e specialitads atras ils cantuns munta gnards Grischun, Uri e Valleis. Da Brig e Vevey vegnan ils animals transportai. Al liug final vegn la gruppa culs animals al lura a contonscher ils 23 da fenadur 2019 igl areal da fiasta dalla Fête des Vignerons.

In viadi pretensius
En quels dis surmunta la gruppa ina distanza da 103 km cun ina differenza d’altezia da 3600 meters ensiviars e 4100 meters engiuviars denter Mustér e Brig. Quei viadi ei era ina pretensiun per Dürst che lavura intensivamein cun cavals. Per quei motiv ei lu era vegniu priu investa detagliada dalla ruta las davosas jamnas. «Enzatgei extraordinari sa adina schabegiar, mo igl ei stau impurtont da mirar schebein la via ei passabla cun cavals», di Dürst. Il viadi meina en sis etappas da Mustér a Sedrun, ad Andermatt, Realp, Oberwald ed Ernen entochen Brig. Suls pass dall’Alpsu e dil Furca surmunta la gruppa duas gadas altezias da biebein 2000 meters. Pil proviant sto la gruppa che vegn accumpignada d’ulteriura glieud far negins quitaus. Sper il material pils animals cuntegn la bagascha era products grischuns certificai d’emprema qualitad. Leutier s’audan caschiel da muntogna, fretgs sechentai, verduras e nuschs sco era carn grischuna, salsizs e tuortas da nuschs.

Partenza festiva
La partenza al viadi ei succedida ier ella cuort dalla claustra a Mustér. El rom dalla ceremonia festiva embellida digl ensemble vocal Incantanti ha il vicepresident dil cussegl grond Alessandro Della Vedova purtau ils salids dallas autoritads cantunalas. Cun la benedicziun entras avat Vigeli Monn ei la gruppa da berniers vegnida relaschada ell’emprem’etappa ch’ha menau da Mustér a Sedrun. En tuts loghens d’etappa ein indigens e hosps da vacanzas envidai da s’entupar culla gruppa. Suenter l’arrivada dalla gruppa mintgamai encunter sera ei in e scadin envidaus ad in aperitiv da beinvegni cun products grischuns ord la bagascha dalla gruppa sco era cun specialitads indigenas. Quels retscheviments vegnan cumpletai ad Andermatt e Brig cun fieras dils berniers sco era ad Oberwald cun ina tavolata
dallas dunnas indigenas. Detagls davart quels arranschaments ein da cattar sin www.graubuendenviva.ch. Via medias socialas da «graubündenVIVA» sa il viadi dils berniers vegnir persequitaus directamein. Ils pli impurtonts muments, interessantas historias e puncts
culminonts dil di vegnan documentai cuntinuadamein sin instagram e facebook.