News-Details

Aviert e colligiau

05.09.2019

(anr/hh) L’ jamna dallas bibliotecas grischunas 2019 stat sut il motto «aviert e colligiau». La finamira da quell’jamna ei da mussar alla publicitad il svilup enteifer las bibliotecas. L’jamna vegnenta ei dedicada el cantun Grischun allas bibliotecas. Igl ei gia la novavla ga  ch’ellas organiseschan ina purschida speciala per la publicitad. Communablamein sepresentan ellas sco partenarias per la cumpetenza da medias ed informaziun. Quei succeda cun prelecziuns, exposiziuns, luvratoris, eveniments, notgs da biblioteca ed autras interessantas acziuns. En ina fuorma plein fantasia e variaziun vegn il motto «aviert e  colligiau» presentaus alla publicitad. Las responsablas ed ils responsabels per las bibliotecas spetgan era dallas visitadras e dils vistaders ch’els seigien aviarts per novaziuns, seigi la colligiaziun cun medias socialas ni en discuors persunals. Dalla partida ein rodund 50 bibliotecas. Tenor il Duden munta il plaid «aviert» ton sco «buca serrau», «buca limitau da resalvas specialas […]», «buca bloccau d’in impediment» e «libramein accessibel». Colligiar sa vegnir descret culs plaids «unir» e «ligiar». Aschia reflectescha il motto dall’jamna dallas bibliotecas il svilup actual ellas bibliotecas, denter auter era il svilup digital. Dalla partida a quell’jamna ei era la Biblioteca populara Mustér e contuorn. Dils 9 tochen ils 14 da settember 2019 ei in e scadin envidaus d’experimentar e d’empruar ora differents models da roboters. La purschida speciala vegn offerida gliendisdis, ils 9 da settember dallas 16.00 entochen allas 18.00, venderdis, ils 13 da settember dallas 16.00 entochen allas 19.00 e sonda, ils 14 da settember 2019 dallas 10.00 entochen allas 12.00. Il team dalla Biblioteca populara Mustér e contuorn, mo era las autras bibliotecas participontas a quell’jamna, selegran da mintga viseta.