News-Details

Las vuschs dil Rein fan l'entschatta dalla sesiun cantica cun in concert

10.09.2019

Las vuschs dil Rein fan l’entschatta dalla sesiun cantica cun in concert

(anr/ff) Sonda, ils 14 da settember concertescha il chor Las vuschs dil Rein a Mustér en halla Cons. Els fan quei en cumpignia dil Chor viril Altstätten SG. Avon treis meins ha il chor sursilvan concertau ad Altstätten ed ussa suonda la viseta dils cantadurs dalla vallada songagliesa dil Rein en Surselva. Cun quella scuntrada vul il chor Las vuschs dil Rein cuntinuar ad entretschar buns contacts cun auters chors situai alla riva dil Rein. Igl intent ei da secunfrontar cun la tgira cantica e svegliar interess per la cultura romontscha da nossas valladas. Quell’activitad ha priu l’entschatta igl onn vargau e vegn a cuntinuar egl avegnir.

Variaziun cantica sil program
In sguard sil program muossa variaziun. Sper las canzuns localas dils dus chors ha ei era plaz per melodias mundialas sco «Das Ave Maria der Berge». Il dirigent Mihai Alexa ed il musicist Albert Schmid portan in cuort intermezzo instrumental cun melodias dalla Rumenia. Il dirigent Claudio Simonet ha preparau cun Las vuschs dil Rein in program da canzuns enconuschentas. Ils cumponists indigens segnan sco auturs, denter auters Giusep Huonder, Duri Sialm ed ils contemporans Rest Giusep Tuor e Claudio Simonet. La canzun dil catschadur da Curo Mani ei veramein ina buna schelta per il temps da catscha present. Per part vegnan las canzuns accumpignadas al clavazin. Thomas Simonet, il giuven pianist da Mustér, supren quell’incarica.

Il concert dil chor mischedau Las vuschs dil Rein ensemen cul Chor viril Altstätten S. Gagl ha liug sonda, ils 14 da settember 2019 allas 17.00 en halla Cons a Mustér.