News-Details

50 expositurs e bia plievgia

25.11.2019

(anr/hh) Malgrad l’aura brutta ei la fiera d’advent la sonda suentermiezdi sigl areal dalla scola a Mustér/Cons stada in success. Attribuiu leutier han ils 50 expositurs cun lur biala e varionta purschida, mo era il program da rama purschius dallas organisaturas dall’Uniun da dunnas Mustér. Bia glieud ei vegnida per guder la caschun da sentupada e per far enqual cumpra ni semplamein per far in sitg. Sco quei che la conorganisatura Rita Huonder di ein ils resuns dils visitaders ed expositurs stai fetg positivs. L’auter onn ha la fiera d’advent da Sursassiala puspei liug a Sedrun.

Fiera d’advent d’aura brutta
50 exposituras ed expositurs ein separticipai alla fiera da Sursassiala a Mustér
DA HANS HUONDER / ANR

Per in’ulteriura ga ha la fiera d’advent dallas vischnauncas da Sursassiala giu liug la sonda vargada a Mustér. La buna e gronda purschida ha signau la sentupada da vischinas e vischins. Schegie ch’ils 50 expositurs han dau tutta breigia da porscher ina bial’atmosfera adattada al temps d’advent ei quella tonaton vegnida signada empauet dall’aura brutta. Enstagl d’ina biala culissa naturala da neiv e temperaturas adattadas alla fin da november ha il favugn procurau per aura migeivla e plievgia. Quellas cundiziuns han tonaton buca stermentau la glieud da serender sigl areal dalla scola a Mustér per guder la purschida e per dar ina paterlada. La finfinala ein talas fieras d’advent buca mo adattadas per la vendita, respectivamein la cumpra d’enqual specialitad dalla regiun, mobein era la caschun da sescuntrar cun vischinas e vischins dall’entira Sursassiala ed era d’ordeifer. Mirau ord quell’optica ha la fiera era adempliu uonn cumpleinamein sia funcziun sociala. Rita Huonder ch’ha organisau la fiera communablamein cun Tina Bundi en num dall’Uniun da dunnas Mustér ei cuntenza cugl andament dalla fiera, malgrad l’aura pauc envidonta: «La glieud ei vegnida stediamein a fiera. Las frequenzas ein stadas en rama dils davos onns. En vesta allas schliatas prognosas dall’aura havevan nus buca quintau cun tonta glieud.» En egl ei la gronda e varionta purschida stada, surtut denton ils biars stans cun products ed
artisanadi dalla regiun. Sper ils 50 expositurs – siat dapli ch’avon dus onns a Mustér – ei era vegniu purschiu uonn in program da rama. Ils asens e la pusseivladad da zambergiar han attratg ils affons ed il cant dalla quarta classa primara da Mustér cul scolast Michel Andriuet ha embelliu la fiera. En biblioteca ei vegniu raquintau historias e las scadialas grondas cun fiug lien han scaldau per in mument il cor dils visitaders.