News-Details

Anavon

09.12.2019

Anavon producescha da camifo
La manufactura da skis a Mustér ei fetg innovativa ed aviarta

DA HANS HUONDER / ANR
Tgi che vul in ski d’Anavon sto haver pazienzia. Il mument producescha la manufactura da skis a Mustér tgei ch’ella po. Cun differentas ideas innovativas plidenta l’interpresa la fiera. Igl onn vargau ha ina gruppa d’acziunaris cun Urs Wullschleger, Kurt Schär, Mauro Lardi ed Andreas Egli surpriu las localitads da producziun da skis da Zai a Mustér. El baghetg che s’auda alla Casatec SA ha ella bein cuntinuau cun la manufactura da skis, mo tenor in’autra filosofia. Ch’ei para d’esser la dretga via muossan las empustaziuns da skis il mument. «Nos quater collaboraturs ein occupai cumpleinamein cun la producziun da skis. Tgi ch’emposta in pèr skis ussa sto spitgar entochen quater jamnas», di Egli ch’ei meinafatschenta d’Anavon en ina plazza parziala. La finamira dall’interpresa ei da construir skis cun in segment da prezis denter 1500 e 1900 francs inclusiv ligiadura: «Nus lein porscher in product ch’ils biars san selubir. Per nos skis s’interesseschan surtut era persunas che vulan saver nua che lur skis vegnan produci e cun tgei material. Biars ein era cunscients dall’impurtonza da plazzas da lavur ella muntogna.» Dapi ch’Anavon Ski SA ei vegniu fundau ed ei en funcziun han 700 pèra skis gia bandunau il luvratori. «Nus havessen bugen in magasin cun skis, mo il mument ein tuts che vegnan construi gia cumprai», constatescha Egli.

Cun filosofia giapunesa ed innovaziuns egl avegnir

La manufactura da skis Anavon Ski SA a Mustér producescha da camifo il mument

DA HANS HUONDER / ANR
Ils collaboraturs dalla manufactura da skis Anavon a Mustér ein occupai il mument cumpleinamein culla producziun da skis. Tenor il meinafatschenta Andreas Egli ei la damonda per skis buna. La finamira ei d’augmentar successivamein la paletta da products ed era da scaffir ulteriuras plazzas da lavur. Igl onn 2018 ha Anavon Ski SA retratg localitads da producziun egl ante riur baghetg dalla stamparia a Mustér che s’auda oz alla Casatec SA. Leu – el plaunterren – vegneva gia produciu avon skis dalla marca Zai. Dapi che la gruppa d’acziunaris cun Urs Wullschleger, Kurt Schär, Mauro Lardi ed Andreas Egli producescha leu regia ina nova filosofia. «Nus luvrein tenor ils principis da Kaizen. Quei ei ina filosofia giapunesa e vul dir ton sco midada (kai) tiel meglier (zen)», di Egli ch’ei meinafatschenta en plazza cumpleina e ch’ha sez in’interpresa a Razén. Quell’ei engaschada ella construcziun tecnica da models e la tecnica da mesiraziun. El sa pia da tgei ch’el tschon tscha sch’ei va per precisiun, lavur da detagl e diever efficient da resursas.

Skis per mintgin

Ina part dalla filosofia ei era il segment da skis ch’Anavon producescha: «Nos skis cuostan denter 1500 e 1900 francs inclusiv ligiadura da Salomon. Els ein pia acquistabels pli u meins per in e scadin, damai che quels skis ein d’aulta qualitad ed han aschia era ina pli liunga veta.» Tenor Egli ch’ei in skiunz passiunau vegnan ils skis produci cumpleinamein a Mustér: «Quei ei made el Grischun.» Persuenter stattan maschinas modernas a disposi ziun. Il material vegn retratgs per part digl exteriur: «Differents materials sco per exempel carbon survegnin nus buc en Svizra.» Dapresent lavuran quater persunas en plazza cumpleina el menaschi, duront la stad porscha Anavon duas plazzas e mesa. La finamira ei d’augmentar il diember da collaboraturs ils proxims onns. La filosofia da Kaizen semuossa era els singuls pass dalla producziun. Min tga uaffen en siu liug, mintga moviment in pass efficient: «Mintga ski ei documentaus e nus savein declarar exactamein tgi ch’ha fatg tgei lavur vid quel. Qualitad ei per nus igl emprem camondament e sche quella constat, lu constat enzacu
era la rendita.» Tonaton sedamondien ins mintga di tgei ch’ins savessi optimar ni far aunc meglier. Ch’ins producescha a Mustér ha per Egli differents motivs: «Skis s’audan ella muntogna e per nus era la producziun. Leutier essan nus en in liug cun territori da skis e savein serender da tut temps sin pista per far nos tests. Cun nossa manufactura lein nus denton era gidar a mantener, respectivamein promover plazzas da lavur ella munto gna.»

Plirs models – biaras colurs

Anavon porscha il mument dus models da skis. In per slalom ed in ski per diever general.
Tuts vegnn produci en pliras colurs, gest tenor il giavisch dil client. Dapresent vegn luvrau vid in ski per freeride, quel duess vegnir spert sin fiera. Naven dil schaner vegn lu gia luvrau vid prototips per las proximas stagiuns. Dapi che la producziun ei vegnida lantschada igl onn vargau ein 700 pèrs skis vegni produci ed il mument vegn luvrau da camifo el luvratori a Carcarola. Per jamna vegnan rodund 16 pèra skis produci. «Il mument luvrein nus sin empustaziun. Tgi che vul in ski sto haver empau pazienzia. Entochen ch’el ei producius savein nus denton metter a disposiziun skis da test», di Egli. Da niev porscha Anavon
era soluziuns specialas per fatschentas. Vul dir: Il logo da fatschenta vegn plazzaus sils skis ed aschia san ellas far reclama era sin pista ni semplamein era nezegiar quels skis sco regal. Per la formaziun visuala dils skis stat in graficher a disposiziun all’interpresa. La manufactura da skis Anavon porscha denton era la pusseivladad da construir sez igl agen ski en siu luvratori a Carcarola. Persuenter vegn purschiu workshops dad in ni dus dis. Enteifer sis uras ei igl agen ski fatgs. Ella vendita da ses skis dispona Anavon Ski SA da plirs canals: Las fatschentas da sport, las interpresas che giavischan in agen ski, la vendita directa a Carcarola e la vendita via internet. Leutier vegnan ils dis da test sin pista. Quels vegnan arranschai en differents territoris da skis.

Sin buna via
«Nus quintein da vegnir ella fasa dil gudogn enteifer tschun onns. Il mument essan nus el plan. In avantatg ei secapescha che nus finanziein sezs il menaschi. Nus essan fetg cuntents co la fatschenta marscha il mument», di Egli. El ei perschuadius ch’Anavon vegn mai a saver concurrenzar culs producents da skis gronds: «Quei lein nus era buc. Nossa finamira ei buns skis, produci cheu e tuttina per in prezi che stat en rama. Nies scop ei da plidentar glieud che va bugen cun skis e ch’appreziescha in bien product. Bia glieud vul numnadamein saver danunder che lur skis derivan.» Ils skis d’Anavon cun in coc da lenn ein products da fetg buna qualitad che fan lur survetsch plirs unviarns: «Era suenter treis ni quater stagiuns ein els aunc buns.» Sper ils collaboraturs engaschai el menaschi lavuran era ils quater commembers dil cussegl d’administraziun parzialmein per l’interpresa. Mintgin hagi qualitads specialas che vegnien dabien al menaschi, di Egli.