News-Details

Niev president dil cussegl da vischnaunca

16.12.2019

(anr/abc) Il cussegl da vischnaunca da Mustér ei s’entupaus venderdis sera ella casa da scola a Segnas per sia davosa sesida sut il presidi d’Armin Berther. Avon che tractar las fatschentas ha il sviluppader regiunal Rudolf Büchi informau  pertuccont l’infrastructura relevanta per la Surselva. Il collaboratur dalla Regiun Surselva ha dau ina survesta oravontut dall’infrastructura turistica. Tala sappi survegnir, culla cundiziun che tuts criteris seigien adempli, in sustegn finanzial dil cantun. El medem connex ha Büchi denton era rendiu attent ch’ei fussi  necessari da collaborar pli stretg enteifer la regiun. Il cussegl ha plinavon priu enconuschientscha dall’agenda 2020 culs termins dallas sedutas. Silsuenter ha el giu d’eleger ils funcziunaris novs dil biro dil cussegl da vischnaunca. Sco president pigl onn 2020 ha la legislativa eligiu Mario Flepp, niev vicepresident daventa Giusep Lozza.