News-Details

Pulenta cun furtem

31.01.2020

(cp) Sonda, ils 8 da fevrer ha l’otgavla ediziun dil Nordic Culinaric respectiv dil Surselva Classic liug denter Trun e Mustér. L’occurrenza da cuorsa liunga cumbinada cun gudiments culinarics dalla regiun ha midau il num avon dus onns per render meglier attenziun agl intent dalla scuntrada. Quei ei allura sepagau, pertgei igl onn vargau ein varga 200 amitgs dalla cuorsa liunga seradunai a Trun ella scrinaria dalla Tarcisi Maissen SA. Suenter in solver da purs ein quels semess sin via pil viadi per liung dil Rein dalla val siadora. Essend las relaziuns extraordinari bialas ha bunamein la mesadad dils participonts contonschiu Salaplauna. Il davos tschancun han els dumignau suenter haver gudiu ina proviantaziun savurusa a Brulf. La proxima pausa – bunamein obligatorica – fan ils participonts alla Destillaria Candinas a Surrein. Leu prendan tuts temps e peda per ina pli liuga discussiun
– dall’aura ni dil vinars. A Trun surveschan las gidontras dils clubs da skis Trun e Mustér il gentar. Sco usitau datti pulenta e furtem. El comite d’organisaziun seigi vegniu discutau pliras ga da survir in auter gentar. Ins hagi denton cattau tal laud per la pulenta e furtem ch’ins resti fideivels alla tradiziun.

Informaziuns digl eveniment e dallas loipas denter Trun e Mustér da nordic-surselva.ch