News-Details

L’interpresa Distec vul producir dapli per l’aviatica

31.01.2020

Per fa quei pass ha l’interpresa la finamira da survegnir entochen la fin digl onn 2020 in ulteriur certificat da qualificaziun. Sco ils responsabels han detg sin damonda dad RTR ei in tal certificat necessaris per insumma puder s’annunziar per ulteriuras offertas en la
branscha d’aviatica.

Dapi il 2014 gia furnitur da Pilatus
Gia dapi igl onn 2014 ei l’interpresa industriala Distec a Mustér ina furnitura per l’interpresa d’aviatica Pilatus dalla Svizra. Era autras interpresas dalla sparta d’aviatica ed el sectur special, sco per exempel la construcziun da rachettas ni parts da rachettas dad Orbit, s’audan tier la clientella dalla Distec. Tgi che stetti davos quellas interpresas sappien ins denton buca tradir. Cun biaras interpresas hagi la Distec numnadamein firmau ina cunvegna da discreziun, di il meinaproject Hans-Peter Müller. Quei seigi in proceder usitau en la branscha.

Certificats da qualitad ston ins haver

Las preparativas per ils schinumnai audits hagien gia entschiet, di il meinaproject ch’habitescha el cantun Turgovia e che tgira surtut il contact culs clients dall’interpresa. Las finamiras che seigien da contonscher seigien denton gest el sectur dall’aviatica fetg aultas e cumplexas, denton tut ils responsabels seigien perschuadi d’haver il certificat giavischau sin la fin digl onn 2020.

Las fermezias dalla Distec

Il mument hagien ins propi buca bia lavur, di Müller. Quei hagi da far cun las midadas da far empustaziuns. Aschia vegnien las empustaziuns fatgas ad adina pli cuorta vesta ed aschia seigi ei difficil da planisar. Mo per igl onn 2020 seigien ins optimistics da contonscher semegliontas cefras sco il 2019 e lez seigi staus in bien onn per la Distec, di Müller. Pertgei las fermezias dalla Distec seigien surtut las persunas che lavurien per l’interpresa, persunas che seigien scoladas e bein motivadas. In avantatg seigi era l’experienza dall’interpresa e quei seigien facturs che svaneschien buc aschi spert, accentuescha il vendider versau.