News-Details

Negin spa sil Cuolm da Vi

21.02.2020

DA HANS HUONDER/FMR

En cumbinaziun cul niev restaurant sil Cuolm da Vi leva Marcus Weber realisar ina partiziun da spa. Il Cantun ha denton refusau quell’idea cull’argumentaziun ch’il baghetg sesanfli buc en zona da baghegiar. Pendenta ei era aunc la damonda, respectivamein la lubientscha da baghegiar per la nova casa da parcar. La mesjamna sera ha igl investur e possessur dallas Pendicularas Mustér SA, Marcus Weber, orientau el Catrina Resort davart quei ch’ei vegniu realisau da sia vart ils davos onns ed ils projects vegnents. La gronda participa ziun all’informaziun ha mussau ch’igl interess pils projects a S. Catrina ed el territori da skis ei fetg gronds. El decuors dils davos rodund treis onns ei vegniu realisau in resort cun sis casas cun habitaziuns da vacanzas ed in hostel cun bunamein 700 letgs, igl anteriur hotel Baur ei vegnius renovaus per part e leutier ei vegniu baghegiau casas pil persunal el contuorn da S. Catrina ed Acletta. El l’emprema secziun el territori da skis ein indrezs d’ennevar vegni installai e parallelmein ei la nova pendiculara da Sedrun sil Cuolm da Vi vegnida realisada sco era leusi in provisori per restaurant ed il runal niev. In pumptrack ed in skillspark per ciclists cumpleteschan la purschida a S. Catrina. «Entochen oz havein nus investau rodund 100 milliuns francs», di Weber ed accentuescha plinavon: «Investi ziuns fan mo senn sch’ellas ein persistentas. Per saver reinvestar ha ei era num fadigiar daners.»

Negin spa
Sco instrument da marketing leva Weber ereger in spa el restaurant niev previu sil Cuolm da Vi: «Sch’ins vul plidentar oz la glieud sche ston ins porscher enzatgei particular. Quei fuss quei spa staus. La survesta naven dil Cuolm da Vi ei numnadamein singulara e cun in spa fuss quei stau ina grond’attracziun.» Il Cantun hagi denton refusau l’idea cul motiv ch’ei setracti leusi buca d’ina zona da baghe giar. Medemamein vegli il Cantun ch’el eregi quei restaurant sin duas alzadas: «Per motivs funcziunals lein nus denton mo in’alzada ed ina certa grondezia ei necessaria sche nus lein luvrar economic.» La lubientscha da baghegiar ei per quei motiv aunc pendenta. Previu ei in restaurant cun 96 plazs da seser, leutier ina lounge ed ina terrassa. L’entschatta dallas lavurs duessen succeder primavera 2021. Pendenta ei era aunc la lubientscha per la nova casa da parcar a S. Catrina. Quella duess porscher plaz a 470 autos. Il tetg dalla casa vegness nezegiaus igl unviern sco parcadi, la stad per infrastructura da divertiment per bike. Ils cuosts persuenter ein calculai cun 6,5 milliuns francs. «Nus essan il mument en discussiun culla vischnaunca. Per lezza corrispunda il baghetg buc a ses criteris architectonics», di Weber. Sin rucca ei era in niev lag per aua d’ennevar a Gendusas. Il contuorn da quel duess survir la stad era sco liug da far in paus. La lubientscha da baghegiar persuenter ei avon maun. A Gendusas duei medemamein vegnir construiu in biketrail per famiglias. Persuenter ve gnan midadas da terren moderadas ad esser necessarias. Ils cuosts ein calculai cun in miez milliun francs. «Quei vegn ad esser in’attracziun e da quellas duvrein nus sche nus lein carmalar hosps da vacanzas la stad tier nus», di Weber. En mira ein era igl indrez d’ennevar da Caischavedra a S. Catrina e la sanaziun dalla terrassa dil restaurant a Caischavedra. En treis onns eis ei previu da sanar la dependance digl anteriur hotel Baur e da far leu habita ziuns da cunproprietad. Il restaurant digl anteriur hotel Baur duei survir egl ave gnir per specialitads grischunas. In’idea ha Weber era pertuccont scursalar. Detagls ha el denton buca vuliu tradir.

Investau el marketing
«Ensemen cun Samih Sawiris havein nus investau gia dus milliuns francs el marketing per la regiun da Mustér, Sedrun ed Andermatt. Jeu numnel Andermatt il davos perquei che gliez liug ei il mument in grev partenari. Nus duvrein il turissem da stad, mo cun quel digl unviern tonsch’ei buc», puntuescha Weber. Ils fretgs dallas stentas el marketing seigien veseivels. Aschia hagien ins per exempel constatau dapli hosps da lungatg talian el territori da skis.