News-Details

Til da temperaturas primavaunas

24.02.2020

 DA HANS HUONDER/FMR

Il til a Mustér ei mintgamai il davos dalla sta giun da tscheiver en Surselva. Uonn ha el giu liug da bellezi’aura da primavera. Per ina ga eis ei numnadamein buca stau necessari da scatschar igl unviern. Quel ei gnanc staus cheu endretg ni silpli mo cuort. «Schlumpfs», rachettas, glimaias e frabiziechels, mo era auters bials sujets han embelliu uonn il til atras il vitg da Mustér. Leutier ein ritmica e bialas melodias dallas guggas vegnidas. Cumpletau quei til ha s. Pieder cun aura e temperaturas da primavera. Per ina ga eis  ei buca stau da schelar agl ur dalla via. Il tscheiver a Mustér ei vegnius cuntinuaus la sonda sera culla gronda sera da divertiment el Center da sport e cultura e vegn terminaus il gliendisdis culla Dertgira nauscha.

Til da tscheiver cun Chines, cowboys, rumien e guggas

Il tscheiver 2020 s’auda prest al vargau. Cul til da tscheiver e la gronda  sera da divertiment a Mustér ha quel contonschiu la sonda in dils puncts culminonts en Surselva. Per ina ga ha negin stuiu serender al til da tscheiver el vitg claustral cun mantel, vons e capetscha. La bellezi’aura e las temperaturas da primavera han procurau per in’emperneivl’atmosfera. Leutier ein 21 gruppas e guggas vegnidas. Bamupis, scoletta, scola e pliras gruppas da carschi dalla  vischnaunca e d’ordeifer han procurau per in til variont e divertent. Ils Royals ein sepresentai cun lur pli niev tip da rachetta, ils amitgs dil tscheiver da Trun ein seregurdai da temps vargai e la giuventetgna da Medel ha presentau ses Superbockemons. Ils Chines, ils Schlumpfs, ils aviuls alla tscherca da flurs, ils cowboys ed indians, mo era il rumien sin viadi ed ils lufs zuppai han fatg honur al tscheiver. Pil divertiment musical han siat formaziuns da gugga procurau, denter auter ina cun fundaturs ed anteriurs musicants da «Las Bagordas» che san festivar uonn il giubileum da 35 onns. Il motto dil tscheiver a Mustér dad uonn ei: «Plans en badundonza, datti aunc speronza? Plans da far il center da sport, plans da far novs hotels, plans per far ina massa. Il sulet che realisescha ei, ei il Marcus Weber, mo mintgaton halt senza tuttas lubientschas.» Il tscheiver a Mustér vegn terminaus da gliendisdis tscheiver cun in til per affons suentermiezdi e la sera culla Dertgira nauscha.