News-Details

Formar culissas ei lavur davos las culissas

24.02.2020

DA HANS HUONDER/FMR
Las culissas ein ina part dil teater, mo meinsvart vegn strusch priu notizia dallas biaras uras da lavur ch’ein necessarias per procurar quellas. Disponer d’ina buna e fideivla gruppa per quell’incumbensa ei per quei motiv da gronda muntada per in’uniun da teater. Prest sepresenta la Gruppa da teater Mustér puspei alla tribuna. Dapi igl atun vegn exercitau mordio vid las presenta ziuns vegnentas. Entochen tier la premiera ils 7 da mars 2020 vegn aunc filau vid ils detagls. Entochen lu duessen denton eras las culissas esser semtgadas. Per che quei seigi il cass ha ei num semetter ad uras alla lavur.

Engaschi duront dus meins

La halla Cons dispona d’ina bun’infrastructura per far teater. Cun occasiun dalla sanaziun cumpleina dil baghetg avon rodund 18 onns era buca mo la sala vegnida travestgida da niev. Era la tribuna era vegnida renovada. Medemamein ei quella vegnida cumpletada da gliez temps cun in indrez d’illuminaziun e tun. Quels indrezs tecnics faciliteschan la lavur dalla gruppa da teater. «Pli baul stuevan nus affittar cazzolas per quei temps. Quellas stuevan nus ir per tut a Landquart, ils cuosts muntavan mintga onn rodund 2000 francs», seregorda Vigeli Lutz che s’engascha ella gruppa da teater dapi la fundaziun avon biebein 30 onns. Mo buca mo quei. «La montascha da quell’infrastructura era buc adina sempla cullas relaziuns da pli baul en halla. Leutier eran biars meters cabel necessaris», di Ignaz Flepp ch’ei responsabels per l’illuminaziun. Quater persunas – treis dad ellas pensiunadas – s’engaschan mintg’onn denter 100 e 200 uras en favur dallas culissas. «In onn dat ei da far dapli, in auter onn dameins», di Corsin Maissen. Sco scrinari eis el quel che prepara en siu temps liber il material necessari, aschia ch’ils «pensiunai» san sededicar mintgamai la mesjamna suentermiezdi alla lavur en halla Cons.

Midar e rimnar
La Gruppa da teater Mustér dispona da dus deposits per ses requisits: In en halla Cons e l’auter el magasin alla staziun dalla viafier. Gest tenor basegns sa in u l’auter object vegnir nezegiaus per la proxima presentaziun da teater. «Ina ga ni l’autra duvrein nus enzatgei auter e lu mirein nus tgi che savess segidar. Secapescha che quels objects vegnan allura era puspei returnai sche quei ei giavischau», di Lutz. Pil pli vegnan las culissas formadas mintg’onn da niev, mo surtut coluradas auter. Grazia alla lavur voluntaria dalla gruppa dallas culissas ha l’uniun mintga onn cuosts da sulettamein 500 entochen 1000 francs per  material. Pil pli setracta ei da plattas da lenn ni colur. Ina ga ni l’autra ston las culissas vegnir allontanadas duront las presentaziuns da teater essend che la tribuna vegn duvrada autramein. «Quei sa capitar entochen treis e quater ga», di Baseli Lutz ch’ei dapi sis onns in commember fidau dalla gruppa da culissas. Che las culissas ein da muntada semuossa mintgamai cura che la tenda vegn tratga l’emprema ga. La reacziun dils aspectaturs ei lu la remunera ziun per la lavur prestada ils dus meins avon. «Bialas culissas ein ina buna part dil teater», constatescha Vigeli Lutz. Per che quei reusseschi ei era ina buna cameradaria enteifer la gruppa necessaria. «Nus s’accordein bein. Quei ch’in sa buc sa l’auter», di Gerold Schmed ch’enconuscha la halla Cons e la tecnica da quella sco siu sac da caultschas sco anteriur pedel.