News-Details

René Epp cun claras imaginaziuns

15.05.2020

Mustér: René Epp cun claras imaginaziuns

(fmr/hh) Il deputau René Epp candidescha pil presidi communal da Mustér. El ha annunziau sia candidatura alla cumissiun electorala. La nominaziun ufficiala ha aunc da succeder.  Il candidat per la successiun da Robert Cajacob che seretila la fin digl onn ei tut auter ch’in nunconuschent sisum la Surselva. Ses emprems pass politics ha el fatg en sia vischnaunca nativa Tujetsch, mo spert ha el era schau sentir si’iniziativa sur ils cunfins da quella ora. El ha sviluppau differentas iniziativas, lantschond denter auter la discussiun davart ina fusiun dallas vischnauncas dalla Cadi. Mo lu ha el era coniniziau l’idea d’ina colligiaziun cun tunnel dalla part su dalla Surselva cul contuorn da Caschinutta. Las elecziuns communalas a Mustér han liug la fin da settember, entochen la fin d’uost han las nominaziuns da succeder.

 
Giuven politicher plein engaschi

René Epp candidescha definitivamein pil presidi communal da Mustér

DA HANS HUONDER/FMR
René Epp (37) ha deponiu sia candidatura pil presidi communal tier la cumissiun electorala. Il proxim temps ha la nominaziun ufficiala aunc da succeder. Il mument vesa ei buc ora aschia sco sch’ei dess ulteriurs candidats per la successiun da Robert Cajacob che ha demissiunau silla fin digl onn.  Ils 27 da settember 2020 elegia Mustér ses gremis politics per la perioda d’uffeci 2021–24. Las nominaziuns pils mandats ein da far entochen ils 28 d’uost 2020, il termin da demissiun ei fixaus sils 26 da zercladur 2020. Gia enconuschentas ein las demissiuns dil president communal Robert Cajacob sco era dil gerau Victor Flepp. Omisdus remettan lur uffecis suenter haver adempliu quels ils dovos quater onns.

In emprem candidat

Pil presidi communal dat ei uss in emprem candidat. René Epp ha annunziau sia candidatura tier la cumissiun electorala. Entochen igl uost ha el aunc da vegnir nominaus ufficialmein, seigi d’in vischinadi, ina partida politica ni ina gruppaziun da 15 persunas. Quei astgass esser sulettamein ina formalitad. Epp ch’ei carschius si en Val Tujetsch habitescha dapi entgins onns a Mustér, ei maridaus e dapi dacuort era bab d’in mattatsch. El ha fatg igl emprendissadi mercantil tier la Banca Raiffeisen Tujetsch e suenter haver rimnau ulteriuras experientschas professiunalas, denter auter ella contabilitad, eis el returnaus igl onn 2009 tier la Banca Raiffeisen Cadi sco cussegliader da finanzas. Leu eis el sescolaus vinavon. Epp che s’engascha cun bia energia dapi onns en pliras uniuns ei era s’engaschaus politicamein en sia vischnaunca nativa. 12 onns eis el staus leu commember dil cussegl da vischnaunca. Otg onns ha el apparteniu al parlament dalla Regiun Surselva e dapi sis onns eis el era deputau el cussegl grond. El parlament cantunal eis el engaschaus dapi dus onns ella cumissiun per politica statala e strategia. Epp ei dapresent era president dalla Spitex Cadi.

Iniziau differents projects

Sco president dil cussegl da vischnaunca da Tujetsch ha Epp pretendiu igl onn 2010 communablamein cul president dil cussegl da vischnaunca da Mustér da lu, Robert Cajacob, in’expertisa per ina colligiaziun da skis sur Cungieri. Oz ei quella realitad. Il medem onn ei Epp era staus coniniziant d’ina retscherca tier la populaziun da Mustér e Tujetsch davart igl avegnir da Sedrun Mustér Turissem ed in bigliet da skis cumbinau denter Sedrun e Mustér. In onn pli tard eis el era staus engaschaus fermamein el rom dalla petiziun «per in avegnir turistic communabel ella Sursassiala» ch’ha pretendiu denter auter ina colligiaziun dils territoris da skis da Sedrun e Mustér ed in avegnir turistic communabel da Mustér-Sedrun ed Andermatt. 2014 ha Epp iniziau la moziun per l’examinaziun d’in studi fundau davart ina colligiaziun da traffic denter Sedrun e Caschinutta cun in tunnel e dus onns pli tard ha el lantschau communablamein cun quater ulteriurs giuvens dalla Cadi l’iniziativa davart contractivas da fusiun ella Cadi, vul dir dallas vischnauncas da Trun, Sumvitg, Mustér, Medel e Tujetsch. Quell’idea ei buca vegnida persequitada vinavon sin fundament da decisiuns ellas singulas vischnauncas.

«Plascher e motivaziun da muentar enzatgei»

Quater damondas a René Epp

DA HANS HUONDER/FMR

René Epp, tgeinins ein ils motivs che Vus candideis sco president communal da Mustér?

René Epp: Jeu fetschel ussa gia dapi bia onns politica e fetschel quei aunc adina cun grond anim e plascher. Tutta politica ch’jeu haiel fatg entochen uss ei pli u meins sebasada sill’intenziun da segidar cullas vischnauncas e da sviluppar vinavon la regiun, ella quala jeu habiteschel e vivel. Cunquei ch’ei drova dabia temps e lavur sch’ins vul far politica progressiva e cunquei ch’jeu sun dacuort aunc vegnius bab hai jeu priu per mei la decisiun dad u far vinavon ni da calar en buca ditg culla politica. Cul sustegn dalla famiglia sun jeu sedecidius da cuntinuar culla politica ed aschia candidar pil presidi, aschilunsch ch’jeu hai il sustegn dalla populaziun. L’exprientscha, la motivaziun, ils contacts e la vegliadetgna ein stai ulteriuras raschuns da candidar. 

Tgei animescha Vus da far quei pass?

Il plascher e la motivaziun da vuler muentar enzatgei e sviluppar vinavon la vischnaunca. Jeu lavurel bugen pil generalesser, vi puspei rinforzar il spért da cuminonza e less era animar la generaziun giuvna da s’engaschar e surprender responsabladad per la cuminonza communala. 

Vesis Vus sesez ch’essas carschi si en Val Tujetsch era empau sco persuna cun ideas per novas cooperaziuns intercommunalas, essas Vus gie era s’engaschai ils davos onns per exempel per projects da fusiun da vischnauncas ella Cadi?

Jeu vegness en mintga cass ad encurir il contact cullas vischnauncas vischinontas per anflar novas cooperaziuns leu nua ch’ei fa senn ed ei impurtont. Cun intensivar collaboraziuns semida bia ga era il patertgar. Igl A ed igl O d’ina vischnaunca ei d’esser autonoma enten prender sias decisiuns, vul dir saver far tut las lavurs aschi independent e professiunal sco pusseivel. Savens ei quei mo pusseivel cun ina certa grondezia. El futur eis ei era impurtont dad haver in bien contact denter la Cadi e Glion.


Tgeininas ein las grondas sfidas ils proxims onns per la vischnaunca da Mustér?

Impurtont eis ei da definir pils proxims onns ina strategia cun claras finamiras e mesiras. Leutier s’auda in precis plan da finanzas. Ins sto impunder ils mieds finanzials el futur aschi effectiv sco pusseivel. Nuot duess pli vegnir senza plan ni spontan. La vischnaunca sto vegnir pli attractiva sco liug da lavur e habitar per aschia evitar ina depopulaziun e la finfinala in digren d’entradas finanzialas. Novas  fuormas da lavur e bunas colligiaziuns da traffic ein grondas ed impurtonas sfidas. Novs projects ambiziunai ein da persequitar entochen ch’els ein realisai. Grond’attenziun finanziala s’auda era allas spartas formaziun e sanadad. Cun pissiun, engaschi e perseveronza sun jeu perschuadius che nus vegnin a dar communablamein il damogn a quellas sfidas.

L’intervista ei vegnida fatga a scret.