News-Details

Diesch milliuns francs en in plum

08.06.2020

DA HANS HUONDER/FMR

Sch’ei va tenor la veglia dil cussegl communal sche vegn la vischnaunca da Mustér ad investir rodund diesch milliuns francs el Center da sport e cultura. La decisiun finala ei els mauns dil suveran. Ella tractaziun dalla fatschenta il venderdis sera ella halla da tennis dil center ha surtut la finanziaziun dil project procurau per discussiuns. Digl entir project cun cuosts da 14,08 milliuns francs duei vegnir investiu brutto 10,6 milliuns francs ell’emprem’etappa. Ils cuosts netto importan rodund 9,7 milliuns francs. Sco quei ch’il president communal Robert Cajacob di vegnan ils deivets dalla vischnaunca a crescher aschia ensemen cun ulteriuras investiziuns necessarias entochen 2025 da 12 sin 29 milliuns francs. Quella dimensiun ha menau a plirs votums, denter auter ei era la damonda dil pei da taglia vegnida tematisada. Mo lu ei era in’eventuala contribuziun dil cantun stada tema da discussiun. La sanaziun ed engrondaziun dil Center da sport e cultura che duei senumnar egl avegnir Center Fontauna cumpeglia differents elements. Sper la sanaziun da differentas parts eis ei previu d’ereger ina nov’entrada cun cafetaria e per l’informaziun. Las localitads sut la halla da tennis duein vegnir nezegiadas egl avegnir denter auter per in niev center da fitness.

Cun gronda maioritad propona il cussegl da vischnaunca da Mustér al suveran d’acceptar il project e credit da 9,7 milliuns francs per l’emprema etappa dall’engrondaziun e sanaziun dil Center da sport e cultura. Ella tractaziun dalla fatschenta ei la damonda dalla finanziaziun stada. Beinsavend che quella possi fatschentar il parlament il venderdis sera ha il president communal Robert Cajacob lu era tematisau ils fatgs finanzials gia all’entschatta dalla tractaziun. Dapresent ha la vischnaunca
in deivet da 12,4 milliuns francs ni 1050 francs per habitont. L’investiziun da rodund diesch milliuns francs el center sco era ulteriuras investiziuns han per consequenza ch’il deivet crescha sin 29 milliuns francs entochen igl onn 2025, vul dir in deivet da rodund 8000 francs per habitont. «La vischnaunca sesanfla il mument en ina dètg buna situaziun finanziala, ils quens dils davos onns ein stai positivs», di Cajacob ed el puntuescha: «Suenter l’investiziun el center havein nus denton buca mo in pli grond deivet, mobein era in scazi cun buna e bial’infrastructura.»

«Ei drova investiziuns»

Medemamein ha Cajacob tematisau la situaziun actuala cul coronavirus: «Nus savein buca tgei consequenzas che la situaziun vegn ad haver sil quen communal, sperein denton che nus metschien cun in egl blau.» In ulteriur punct tematisaus dad el pertucca il pei da taglia. Ina eventuala reducziun da quel vegn discutada il mument d’ina cumissiun. Il project e credit per l’engrondaziun e sanaziun dil Center da sport e cultura seigi vegnius tematisaus dalla suprastonza communala el rom dalla tractaziun dil plan da finanzas, la decisiun vegni allura a flessegiar ella tractaziun finala da quei instrumentari che vegn suttamess igl uost al cussegl da vischnaunca. «Il center ha da basegns d’ina sanaziun, mo ei drova era in augment dalla purschida. La suprastonza communala ei ferm perschuadida da quei project, era sche las finanzas dattan da patertgar», puntuescha Cajacob. El accentuescha era la buna collaboraziun sul cuolm cun Andermatt, mo lu era ils projects realisai ni sin rucca a Mustér: «Ils investurs spetgan in engaschament era dalla vischnaunca en favur dil svilup turistic.»

«Nus sperein…»
Suenter in excuors ella historia dil Center da sport e cultura, che duei vegnir numnaus da niev Center Fontauna, entras il gerau e president dalla cumissiun da menaschi dil center, Clemens Berther, ha igl architect Simon Bisquolm da Huonder Bisquolm Architects presentau il project sin fundament d’ina visualisaziun. La finanziaziun dil project ei reglada per gronda part, mo ei dat aunc enzennas da damonda. Ina da quellas pertucca in’eventuala contribuziun dil cantun. «Nus quintein cun ina decisiun il proxim temps, en mintga cass lein nus denton saver presentar quella all’informaziun publica en vesta alla votaziun dil pievel», puntuescha Berther. La relevonza dil center per la regiun ei vegnida accentuada dil sviluppader regiunal Ruedi Büchi. Ch’il cantun considereschi da sbursar in emprest pil center seigi d’attribuir all’impurtonza dil center pil turissem, mo lu era alla collaboraziun previda dallas vischnauncas da Tujetsch e Mustér sil sectur dall’infrastructura turistica. La damonda buca rispundida definitivamein davart la contribuziun dil cantun ha lu era procurau per discussiuns el ravugl
dil parlament. Ins plaidi da signals e da speronza, quei che seigi secapescha tut auter che segir. En discussiun ei ina summa d’entochen in milliun francs dil cantun stada. Critica ha ei medemamein dau per quella. Ella seigi bia memia bassa per in project da tala impurtonza e dimensiun. Mo lu ein era las consequenzas finanzialas per la vischnaunca a media vesta stadas tema da discussiun. Ellas blocheschien auters impurtonts projects sco per exempel la sanaziun dalla casa da scola. Cajacob ha puntuau ch’ei vegni segiramein buc ad esser aschia ch’ins sappi insumma buca far ulteriuras investiziuns, mo quellas stoppien succeder tenor claras prioritads. In auter tema ei stau il pei da taglia, schebein quel resti tier 120 pertschien ni stoppi schizun vegnir alzaus sin 130 pertschien. Ei drovi transparenza els fatgs finanzials, veglien ins haver success cun quei project tiel pievel. Tenor il vicepresident dalla cumissiun da menaschi, Alfons Quinter, quenta il center da sport cun in augment dallas entradas dil center egl avegnir sin fundament dallas novaziuns previdas.

Sustegn da San Gottardo
Vid ils cuosts totals da 10,6 milliuns francs per l’emprem’etappa retscheiva la vischnaunca ina prestaziun d’equivalenza dil Program San Gottardo da 460 000 francs. Plinavon sa ella quintar culla restituziun dalla taglia sin plivaleta ell’altezia da 450 000 francs. Aschia sedat in credit
netto da 9,69 milliuns francs. La finanziaziun da quella summa duei succeder denter auter era cun in credit senza tscheins dil Program San Gottardo ell’altezia da dus milliuns francs sco era cullas reservas fatgas persuenter dalla vischnaunca ils davos treis onns ell’altezia da 2,8 milliuns francs. La Repower ei promta d’ereger in indrez da fotovoltaica sil tetg dil Center da sport e cultura. «Cheutras sa la vischnaunca spargnar rodund 180 000 francs per ina cuvrida nova. Leutier vegn il center a saver retrer egl avegnir l’energia producida leu per cundiziuns specialas», di Berther. Ils proxims 20 onns – aschi ditg cuoza era il contract culla Repower – sappi la vischnaunca spargnar aschia 150 000 francs per energia. «La Repower ei promta d’investir en quei implont rodund 800 000 francs», di Berther.