News-Details

Pendicularas freinan lur projects

30.09.2020

Pendicularas freinan lur projects

DA HANS HUONDER/FMR
„Igl acziunari principal dallas Pendicularas Mustér SA ed investur Marcus Weber ha frenau ils projects dalla casa da parcar a S. Catrina e dil restaurant sil Cuolm da Vi. Sco quei ch’il directur dallas Pendicularas Mustér SA, Stefan Arnold, ha detg sin damonda dalla FMR, vegnan ils dus projects buca realisai il mument. Marcus Weber hagi decidiu in stop da baghegiar. Buca pertuccaus da quei stop ei il project dil «Flowtrail», la descensiun per velos per famiglias da Gendusas entochen Caischavedra. Tenor Stefan Arnold ein ils recuors e las intervenziuns da pliras varts il motiv principal da quella decisiun. Il project dalla casa da parcar ei calculaus cun cuosts da rodund 6,5 milliuns francs. El preveda 470 parcadis. Sil Cuolm da Vi era ei previu in restaurant cun 96 plazs da seser, leutier ina lounge ed ina terrassa. L’entschatta dallas lavurs dil restaurant eran previdas la primavera 2021. Pertuccont il diember da parcadis vesa Stefan Arnold buca in problem per las pendicularas: «En in contract digl onn 2008 s’oblighescha la vischnaunca da Mustér da metter a disposiziun 130 parcadis el contuorn dil Center Fontauna allas Pendicularas Mustér SA. Quei contract stat en connex cul terren che las pendicularas han cediu pil project dil hotel Acla da Fontauna.» Sin damonda dalla FMR ha il president communal Robert Cajacob declarau che la lescha prescrivi negin diember da parcadis per las pendicularas. Ei stoppi esser egl interess da lezzas da disponer da tals. D'in contract cun l'obligaziun dalla vischnaunca da metter a disposiziun 130 parcadis sa Robert Cajacob nuot: «Ils skiunzs san far diever dils parcadis sur e sut via spel Center Fontauna per las cundiziuns che auters fan era. Plinavon stat la parcella sur il hotel Acla da Fontauna che s'udeva pli baul allas pendicularas a disposiziun per parcadis ad ellas entochen ch'il project dil hotel ei realisaus.» Tenor Robert Cajacob installescha la vischnaunca il proxim temps uras da parcar sils parcadis el contuorn dil Center Fontauna. Ils visitaders dil center duein lu saver far diever gratuit in temps limitau da quels. Marcus Weber ei buca staus contonschibels per ina posiziun.