News-Details

Approbau il preventiv

16.11.2020

(fmr/ac) Il cussegl communal dalla vischnaunca da Mustér ei sefatschentaus il vendergis vargau cun il preventiv. Suenter buna e fundada discussiun, sco ei stat scret ella communicaziun communala,
ha il cussegl approbau unanim il preventiv 2021. Ed ultra da quei fixau il pei da taglia sin 120 pertschien dalla taglia cantunala ordinaria e la taglia sin schischom sin 1,7 promil, tut sco entochen dacheu. Sin proposta dalla suprastonza ha il cussegl decidiu da risguardar el preventiv
2021 ils cuosts per reparar ils donns dallas malauras digl october 2020 ella summa netta da 301 300 francs. E vinavon ha il cussegl augmentau la contribuziun al Spital regiunal Surselva per 55 000 francs. Quei sin fundament dallas informaziuns era en connex cun il coronavirus. Suenter quellas ed ulteriuras
adattaziuns quenta la vischnaunca da Mustér per igl onn proxim cun expensas da 16,081 milliuns francs visavi entradas da 16,336 miliuns francs cun in surpli d’entradas da 255 100 francs. Il cashflow
da 956 600 francs pervius pigl onn proxim valetescha la suprastonza communala per plitost mudests. Dallas investiziuns nettas da 5,973 milliuns francs previdas ein 1,6 milliuns dad attribuir allas investiziuns el Center Fontauna, 1,4 milliuns vegnan investi ellas vias communalas ed 1,12 milliuns francs van allas spartas ambient e planisaziun (canalisaziun, serenera, economisar rumien e deponias).