News-Details

«Il sustegn da mes collaboraturs legra mei il pli fetg»

31.03.2021

«Il sustegn da mes collaboraturs legra mei il pli fetg»
Prest ei René Epp 100 dis en uffeci sco president communal da Mustér

HANS HUONDER/FMR
„Igl emprem da schaner 2021 ha René Epp surpriu il presidi dalla vischnaunca da Mustér. Igl ei siu emprem uffeci politic executiv. La FMR ha vuliu saver dad el, co quels emprems meins ein stai, tgei che ha legrau el, mo era trumpau el pli fetg.

René Epp, Vus essas ussa prest 100 dis president communal da Mustér. Per cons onns essas Vus vegni pli vegls en quels 100 dis?

René Epp: Jeu sundel restaus giuvens e plein motivaziun, era suenter 100 dis. Il plascher da quei uffeci ei fetg gronds ed jeu emprovel da s’engaschar cun tutta forza. Jeu hai buca l’impressiun ch’jeu seigi vegnius per onns pli vegls. La glieud entuorn mei motivescha mei.

Co sesentis Vus en quei uffeci e fagesses Vus aunc ina ga il pass ella politica professiunala?
Suenter quels emprems 100 dis astg’jeu veramein dir ch’jeu sesenti fetg bein e ch’jeu fagess aunc ina ga quei
pass. En treis ni quater onns detg jeu forsa enzatgei auter, jeu saiel buca. Jeu astgel dir cun buna cunscienzia: Las empremas experientschas ei positivas, igl ei in uffeci vast ed interessant.

Vus essas vegni eligi igl atun cun in fetg bien resultat. Fa quel squetsch?
Gie, quei resultat fa veramein empau squetsch. El pretenda da far tut il pusseivel per ademplir ils giavischs dalla
populaziun. Jeu less veramein era far tut il pusseivel e less era mussar ch’jeu sundel veramein fetg motivaus.

Ein las speronzas dil pievel pli grondas sch’in politicher giuven vegn en uffeci che sch’in arrivau surpren ina tala funcziun?
Gie, jeu crei che las speronzas seigien autras el senn ch’ina persuna empau pli giuvna vegn forsa cun in’autra dinamica. Forsa era cun autras ideas ed in auter patertgar. Jeu crei che quei vegni era spitgau da pliras varts. Tier ina midada speran ins ch’ei mondi vinavon auter.

Tgei ha fatg a Vus il pli grond plascher en quels 100 dis e tgei ha trumpau Vus?

Il pli grond plascher hai jeu propi giu dil sustegn ch’jeu hai retschiert dallas collaboraturas e dils collaboraturs el senn d’empruar da realisar mias ideas ed intenziuns. Gest sin plaun strategic havein nus gia definiu pliras novaziuns. Quei muossa che l’experientscha ei avon maun e la promtatad da sustener in giuven ei
cheu, numnadamein da far tut il pusseivel per vegnir vinavon in pass. Empau trumpau mei ha la sceptica e quella fa surstar mei empauet. Jeu hai sentiu quella en in discuors ni l’auter. Jeu sundel gie buca carschius si a Mustér e hai en quei senn era buca pregiudezis enviers ina caussa ni l’autra. Per quei motiv po mia dinamica fruntar tier in ni l’auter sin resalvas. Jeu less dar alla populaziun il sentiment che nus essan ina buna e ferma
vischnaunca e targein tuts per la medema suga. Resalvas ein denton adina era ina basa da discussiun. Ellas lubeschan d’argumentar daco ch’ins less empruar dad ir quella ni tschella via.

Igl ei l’emprema ga che Vus haveis ina funcziun executiva ella politica. Tgei munta aschia in uffeci, era il temps liber?

En emprema lingia ei quei uffeci secapescha cumbinaus cun fetg bia responsabladad. Fetg bia va sur la meisa
dil president communal ora. Ei fa da basegns da sefatschentar intensivamein da mintga caussa, cass cuntrari
crodan lur forsa decisiuns che han in’influenza negativa sil mintgadi. Igl uffeci da president communal ei in da
siat dis e 24 uras. Jeu vegnel era plidentaus sin via sonda e dumengia davart fatgs politics. Quei era secapescha buca il cass avon.

Nua vesis Vus il pli grond potenzial da migliur ni aschidadir da midar en vischnaunca?

Quei ei ina greva damonda. La vischnaunca ha potenzial per migliurs el senn ch’ella duei daventar pli attractiva.
Quei ei nossa finamira. Vid quei stuein nus luvrar, surtut pils indigens, mo lu era pils hosps da vacanzas e quels che han l’intenziun d’introducir a Mustér ina ni l’autra purschida nova.

Nua duei la vischnaunca esser quei di che Vus abdicheis sco president communal?

La vischnaunca da Mustér duei esser il subcenter dalla Surselva, quei vul dir il pli impurtont liug da habitar e luvrar suenter Glion. Arisguard las finanzas duei ella esser sauna e haver ils mieds finanzials per investir. Cun mintgin da nus – populaziun, stizuns, fatschentas, hotellaria e gastronomia – duei ei ir meglier che ussa.
Sch’ei reussescha d’augmentar l’entrada tier mintga singul, lu eis ei bien. Quella finamira ei contonschibla sulettamein cun esser attractivs. Cun nus va ei segir buca mal, mo quei duess esser la finamira.
Ei quei il cass, ha la vischnaunca scaffiu las dretgas cundiziuns da basa. Sche nus vegnin buca da far quei ed ei va anavos, lu stuein nus ir suls cudischs. Nus lein propi far la vischnaunca pli attractiva, procurond per saunas finanzas.

Savess ina reducziun dil pei da taglia esser in pass en quella direcziun?

Davart il pei da taglia discussiunein nus il mument. Sche nus daventein pli attractivs ed ei reussescha a nus da prender las mesiras necessarias, sa quei esser ina consequenza. In pei da taglia pli attractiv ei segir pusseivels quei mument ch’ei va meglier culla vischnaunca. Las proximas jamnas vegnan a mussar entgei direcziun ch’ei va a cuorta vesta.