News-Details

Ulteriuras 800 persunas san schar vaccinar a Mustér

07.06.2021

(fmr/hh) En in’jamna organisescha igl Uffeci per sanadad dil Grischun in’ulteriura acziun da vaccinar encunter Covid-19 a Mustér. Sco quei che la responsabla pils teams mobils da vaccinaziun el Grischun, Lisa Peers Dermont ha detg enviers la FMR, ein 800 dosas da vaccin semtgadas pil gliendisdis e mardis en halla Cons. L’acziun ei destinada per persunas che habiteschan ellas quater vischnauncas sisum la Surselva: «Aschia lein nus spar-gnar a quellas il viadi a Glion.» La secunda vaccinaziun ha liug in meins pli tard. La vaccinaziun encunter il coronavirus ha surve-gniu tempo las davosas jamnas. Il motiv ein gronds quantums dil vaccin ch’arriva en Svizra. Allas duas empremas acziuns a Mustér ei vegniu vaccinau cul mied da Pfizer BioNTech, ussa vegn quel da Moderna purschius. Per giuvenils denter 16 e 18 onns vegn vaccinau Pfizer BioNTech. En-tochen en in meins ei biebein la mesadad dalla populaziun grischuna vaccinada silmeins ina ga.

Ulteriuras 800 persunas san schar vaccinar a Mustér

Ils 14 e 15 da zercladur 2021 organisescha igl Uffeci per sanadad dil Grischun in’ulteriura acziun da vaccinaziun encunter corona Hans Huonder/FMR
Persunas da Sumvitg, Medel, Mustér e Tujetsch ch’ein s’annunziadas per schar vaccinar encunter Covid-19 e che han aunc negin termin, vegnan risguardads per in’ulteriura acziun da vaccinaziun a Mustér. Sco quei ch’igl uffeci ha detg sin damonda dalla FMR, stattan 800 dosas a disposiziun pigl emprem vaccin duront quels dus dis. Tgi che s’annunzia quels dis cheu ha grondas schanzas da vegnir risguardaus per quell’acziun. Ils 14 e 15 da zercladur 2021 eis ei gia la tiarza ga ch’igl Uffeci per sanadad dil Grischun vaccinescha encunter Covid-19 en halla Cons a Mustér. Il motiv da quellas acziuns che vegnan dil reminent era purschidas en autras regiuns periferas dil Grischun, ei da spargnar a bia glieud il viadi en in center sco per exempel a Glion. Cun quellas acziuns eis ei denton era pusseivel da descargar ils centers da vaccinaziun. «Nus survegnin ussa successivamein mieds da vaccinaziun e lessen empruar da vaccinar aschi spert sco pusseivel tuttas persunas che vulan quei», di Lisa Peers Dermont che coordinescha pigl uffeci ils teams mobils da vaccinaziun el cantun Grischun. Sper las acziuns da vaccinar regiunalas ha ella era coordinau quellas ellas casas da tgira ni era en perschuns e centers per requirents d’asil.

Annunzias ein aunc pusseivlas

Per ils dus dis da vaccinaziun specials a Mustér stattan 800 dosas a disposiziun: «Sin fundament da nossas datas han rodund 450 persunas da Sumvitg, Mustér, Medel e Tujetsch ch’ein s’annunziadas per la vaccinaziun aunc retschiert negin termin. Ellas vegnan risguardadas cun quella caschun a Mustér.» Risguardadas vegnan tuttas persunas, era giuvnas entochen 18 onns ch’ein s’annunziadas silla homepage digl uffeci e che han dimora en ina dallas quater vischnauncas: «Quellas persunas han gia survegniu ni survegnan in sms cul termin en halla Cons a Mustér.» Quella ga dat ei pia buca in’acziun per telefon sco las davosas duas ga. La finamira digl uffeci ei da saver vaccinar 800 persunas quels dus dis a Mustér. Damai ch’ei dat il mument pli paucas annunzias che mieds che stattan a disposiziun quels dus dis, san aunc rodund 350 persunas vegnir risguardadas. Ellas ston s’annunziar sul canal ufficial, vul dir la homepage digl uffeci. Tenor Lisa Peers Dermont eis ei era previu da vaccinar giuvenils denter 16 e 18 onns. Tenor la menadra dil team da vaccinaziun dil Grischun, Doortje Engel, ein fetg paucas persunas da quella vegliadetgna s’annunziadas entochen ussa: «Ils proxims dis lein nus era informar las scolas davart quella pusseivladad.

Biars manegian probabel ch’els seigien aunc ditg buca en retscha, mo quei ei buca aschia.» Ils giuvenils vegnan vaccinai cul mied da Pfizer BioNTech, las autras persunas cun Moderna. Ils motiv ch’ins vaccinescha ussa era a Mustér cun Moderna ei il grond quantum da mieds da vaccinaziun da quella marca ch’arriva il mument en Svizra. Il secund termin da vaccinaziun ei ils 14 e 15 da fenadur 2021.

Emperneivla collaboraziun

«Entochen ussa ei il quantum da mieds da vaccinaziun staus limitaus e nus savevan era buca adina contas dosas ch’arrivien cu. Sco ei vesa ora ussa ei tut bia pli clar il proxim temps e lubescha aschia era d’organisar meglier ils termins», di Lisa Peers Dermont ch’ei carschida sia a Rueun e che habitescha ussa a Laax. Impurtont: Persunas che s’annunzian ussa per la vaccinaziun anflan buca silla homepage Mustér sco liug da vaccinaziun. Per quei motiv ha ei num eleger il liug Glion. Sin fundament dalla registraziun – surtut la cefra postala dalla vischnaunca – vegnan quellas persunas lu a survegnir per sms il termin per schar vaccinar a Mustér. All’emprema acziun da vaccinar a Mustér ein 320 persunas vegnidas risguardadas, alla secunda rodund 300. Suenter la proxima ga eis ei da supponer ch’ei dettia buca pli ina tala acziun. «Nus quintein che la gronda part dallas persunas che vul schar vaccinar hagien lu fatg quei.

Ussa dat ei secapescha era la pusseivladad da schar vaccinar tier miedis da casa», constatescha Lisa Peers Dermont ch’ei engaschada tiegl uffeci dapi il schaner passau. Cullas acziuns ellas regiuns eis ella fetg cuntenza: «Nus havein ina fetg buna collaboraziun cullas vischnauncas ed il contact culla glieud ei fetg emperneivels e pragmatics.»

Dapli vaccin che annunzias

Sco quei che Doortje Engel di, dispona il cantun Grischun ils proxims meins d’in quantum sufficient da vaccin: «Nus havein il mument a disposiziun dapli vaccin che annunzias. Per quei motiv appellein nus allas persunas ch’ein aunc buca s’annunziadas da far quei.» Entochen ussa ein rodund 72 000 persunas vaccinadas ina ga, rodund 50 000 persunas han gia giu omisduas vaccinaziuns el Grischun. Sin fundament dil vaccin ch’ei staus ni ch’ei a disposiziun eis ei pusseivel da procurar che 115 000 persunas el cantun Grischun han retschiert silmeins ina dosa entochen l’entschatta fenadur. Cun auters plaids: Biebein la mesadad dalla populaziun dil Grischun ei virolada silmeins ina ga entochen en rodund treis jamnas.