News-Details

A Caischavedra/Cavardiras ei dabia material en moviment

10.06.2021

SUSI ROTHMUND/FMR

Actualmein ei la senda da viandar naven dil Lag da Laus ella vischnaunca Sumvitg entochen Caischavedra ella vischnaunca Mustér serrada. Ella meina atras ils darguns da Valens e Pardomat. Agl ur dalla val Pardomat sin in mises a Caischavedra ha ei dau questa primavera in scarp ella tiara e plirs 10 000 meters cubic ein en moviment e pudessan ir aval. «Igl ei in fenomen dalla natira ed atgnamein nuot extraordinari. Darguns semaglian cul temps adina pli e pli profund ellas vals ed enqualga rumpa il terren giu als urs sissum las vals ni ch’ei dat scarps sco ussa sin in mises a Caischavedra/Cavardiras», declara Simon Cathomen, il selvicultur communal dalla vischnaunca Mustér. Il scarp ei vegnius annunziaus suenter Anceinza e ladinamein han ils responsabels evaluau la situaziun e serrau la senda da viandar che meina tras ils darguns da Pardomat e Valens. La via da velos giudem las vals sper il Rein ei pil mument buca periclitada da bovas ed aschia aviarta. Il Lag da Laus ei vinavon contonschibels da Laus anora. Il scarp el prau d’in mises ha ina ladezia da 10 entochen 15 meters ed ei denter 100 e 150 meters liungs. «Plirs 10 000 meters cubics material pudessan curdar aval e nus havein installau puncts da mesiraziun», di Simon Cathomen. In geolog seigi staus sil plaz per evaluar la situaziun, mo en vesta als scenaris pusseivels hagi era quel manegiau ch’ei seigi empau sco da leger el fundagl dil caffee.

Plirs scenaris

Tenor Simon Cathomen dat ei plirs scenaris pusseivels: «Il terren sa ruschnar aval ni sefermar.» Ei pudessi per exempel esser ch’ei hagi sut il scarp in pei che stabiliseschi il material e tut stetti eri. Gest aschi bein sappi ei denton era esser che la bova rumpi ora ella plaunca e tut il material mondi aval. Perquei vegni la situaziun observada ed ils moviments miserai. Sch’ei stetti eri vegni la senda puspei aviarta, autruisa vegni quella sviada. Sco il selvicultur declara, ha l’aura secapescha dabia influenza e sch’ei pluvessi ditg e fetg accelerassi quei il process. Per prevegnir a pli gronds donns ha el schau pinar las plontas
sil terren pertuccau e quellas vegnan ussa sguladas giuadora. «Quei havein nus fatg per ch’ellas vegnien buca attaccadas dil bau», explichescha Simon Cathomen. Plinavon fussi ei prigulus, sch’il material massi giu ella val cun plontas e tut. Quellas pudessien stupar spert il dargun e la probabilitad ch’ei detti ina bova fussi aunc pli gronda. Mo era senza plontas fuss ina bova el dargun da Pardomat pusseivla, sche quel sestaupa. Lezza periclitass la via da velos denter Valens e Pardomat. «Quei fuss lu sin terren dalla vischnaunca Sumvitg ed ella responsabladad da lezza. Perquei collavurein nus gia ussa ed evaluein communablamein la situaziun», puntuescha Simon Cathomen.