News-Details

Las pli bialas cristallas da Tujetsch, Medel e Mustér

03.08.2021

L’exposiziun speciala da quest onn ei dedicada allas pli bialas cristallas anfladas ellas treis vischnauncas sisum la Surselva. Ils organisaturs muossan tocca ord collecziuns privatas.

Hans Huonder/FMR

Sonda e dumengia proxima ha liug el Center Fontauna a Mustér la 57avla buorsa da cristallas e minerals arranschada dall’Uniun Cristallina Mustér. La buorsa ei buca mo in’attracziun pils interessai dalla mineralogia, mobein era per in e scadin ch’appreziescha schiglioc la natira e ses scazis. Fascinonta ei la fiera surtut era pils affons. Suenter che la buorsa ha buca saviu vegnir purschida igl onn vargau pervia dalla pandemia cul coronavirus, astgass ella puspei attrer fetg bia glieud uonn. Ils onns avon vegnevan entochen 1800 persunas – excepziunalmein era dapli – per guder l’atmosfera dils cavacristallas e forsa era far ina cumpra ni l’autra. Sco quei che la presidenta dall’Uniun Cristallina Mustér, Vreni Werth di, eis ei stau necessari da procurar per in concept da protecziun e segirtad per la buorsa da quest onn. Per quei motiv ei la buorsa lu era vegnida adattada.

Sulettamein crappa dalla Svizra

Alla fiera da Mustér astga vegnir presentau e vendiu sulettamein cristallas e minerals anflai en Svizra. «Quella particularitad vegn appreziada fetg, ton dils expositurs sco dils visitaders. Aschia stattan cristallas e minerals el center e vegnan buca concurrenzai da minerals e fittem digl exteriur», di Vreni Werth. La fiera da Mustér ei la capo-buorsa svizra cun crappa anflada spirontamein en Svizra. La gronda part dallas autras fieras svizras lubescha era il commerci cun fittem, cristallas e minerals digl exteriur. La pli gronda part dils expositurs ein cavacristallas activs che vendan principalmein cristallas ch’els han anflau sez. Dils 44 expositurs derivan 18 dil cantun Grischun, quater dil cantun Tessin, sis dil cantun Uri e 14 d’auters cantuns. Dus dils expositurs derivan digl exteriur, numnadamein dalla Belgia ed Austria. Era els ston setener vid la directiva da presentar e vender sulettamein crappa anflada en Svizra. Cun rodund 160 meters meisa ei la surfatscha sco tala d’exposiziun ella rama dils davos onns.

Crappa indigena sco attracziun

Sco mintg’onn presenta l'Uniun Cristallina era uonn in’exposiziun speciala. Quella muossa las pli bialas cristallas da sisum la Surselva, vul dir tocca anflada sin intschess dallas vischnauncas da Tujetsch, Medel e Mustér. «Ei setracta d’exponats ord collecziuns privatas mess a disposiziun per exponer duront ils dus dis da fiera», di Vreni Werth. Dalla partida alla buosa ei ina ga dapli l’Uniun svizra dils cavacristallas (SVSMF). Ella informescha davart siu intent e presenta era in stan da cudischs e cartas davart la mineralogia. Duront ils dus dis dalla buorsa ei il museum da cristallas Cristallina el plaunterren dalla halla Cons a Mustér medemamein aviarts. Cun rodund 500 exponats ord l’entira Surselva dat il museum ina grondiusa survesta dalla reha varietad da minerals e cristallas ch’ein d’anflar ella regiun, ina dallas pli grondas regiuns da cristallas dalla Svizra.

* Ulteriuras informaziuns sco era ils temps d’avertura dalla buorsa ein da cattar sin www.uniun-cristallina.ch.