News-Details

La fiera s. Martin pudess vertir dapli marcadonts dalla regiun

16.11.2021

SUSI ROTHMUND/FMR

Alla fiera s. Martin van ils biars visitaders buca mo ina, mobein duas ni era treis ga dalla Via Lucmagn si e giu. Pli biaras ga ch’ei van e pli biars enconuschents ch’ei entaupan per dar ina paterlada. Quellas sentupadas duront la fiera a Mustér han numnadamein muncau igl onn vargau. Lu ha la fiera s. Martin – sco biaras autras era – stuiu vegnir annullada pervia dalla pandemia. La FMR haveva rapportau dalla fiera che haveva buca giu liug, e quei probablamein per l’emprema ga en sia historia da plirs tschentaners.

Empau bia capetschas e schals

Tgi ch’enconuscha la fiera s. Martin a Mustér po s’orientar suenter la colur dils tetgs dils stans. Quels culs tetgs da sdremas en alv e blau ein pil solit quels dils marcadonts dalla regiun che han affittau ils stans dalla vischnaunca Mustér e quels cun tetgs d’autras colurs s’audan als marcadonts jasters. Roger Lutz mava ier tras las retschas per mirar che tut seigi en uorden ed en siu liug. Sco igl emploiau dalla vischnaunca Mustér ha declarau, sa la fiera s. Martin normalmein quintar cun rodund 50 marcadontas e marcadonts. Uonn hagien ei previu ina fiera pli pintga cun 40 stans per puder risguardar las distanzas necessarias. La finfinala ein enzacons marcadonts lu semplamein buca vegni ni han giu incaps, aschia che 35 ein stai ier dalla partida. Spassegiond denter ils stans pareva ei d’haver bravamein bia capetschas e schals e quell’impressiun ha era Roger Lutz confirmau: «Ei fuss interessant d’haver dapli marcadontas e marcadonts indigens ni dalla regiun. Nus empruein da motivar.»

«Ins vegn buca propi vinavon»

Naturalmein eran ils marcadonts dalla regiun era presents cun lur products sco caschiel e carn, legums, cremas per la pial ni uorden da schubergiar e bia auter. Ei pudess denton senz’auter vertir dapli stans cun products regiunals e d’artisanadi sco quels dil luvratori Argo a Glion. Muncau ha era il stan da grill, persuenter han ils cuschiniers dalla Gilda surviu in bien risotto a favur dalla Societad svizra dalla sclerosa multipla ed ils Lions dalla Tgina dil Rein ina gustusa suppa da giutta a favur dallas giuvnas «musiCantas». «Ordaviert duess il prighel dil coronavirus buca esser aschi gronds, perquei havein nus decidiu d’organisar la fiera s. Martin uonn. Quella ha tradiziun ed ei fetg impurtonta per Mustér. Ei sto puspei dar in tec moviment ed ei fa senn da sentupar», ha René Epp declarau. Era il president communal da Mustér ei s’entupaus ier silla Via Lucmagn cun glieud da pliras vischnauncas vischinontas. «Ins vegn buca propi vinavon», ha el manegiau ed aschuntau che quei s’audi aschia. Ins duessi prender la peda da salidar in l’auter e dar enqual paterlada.

Dapi 42 onns alla fiera s. Martin

Biaras marcadontas e marcadonts ein mintg’onn alla fiera s. Martin. «Alle Jahre wieder», di era Robert Bieri salidond in client che vegn per maruns. Bieri ei dapi 42 onns alla fiera s. Martin. Quei fagevi numnadamein gia siu antecessur dil qual el hagi surpriu la fatschenta. Il brassamaruns ch’ei oriunds da Buchs ha adina puspei clientella da tschèp che vegn neutier per in satget maruns e sco el di, venda el circa 150 kilos alla fiera s. Martin. Quei seigi denton different, ina ga dapli ed ina ga pli pauc. Sur quater decennis ha il brassamaruns saviu observar las fieras empau dapertut en Svizra e sco el di ei bia semidau. «Ils daners ein bein aunc d’entuorn mo la glieud ed oravontut las famiglias drovan quels per autras caussas sco igl auto ni ils telefonins. Nus che vendin victualias havein aunc bien sch’ins cumpareglia culs marcadonts che vendan vestgadira, quei vuless jeu buca far.»