News-Details

1113 indigens han priu la carta gratuita

14.01.2022

Hans Huonder/FMR

Ferton ch’ils hosps da vacanzas da Tujetsch e Mustér disponan dapi plirs onns d’ina carta gratuita per differenta purschida duront la stad, ei ina tala mai stada in tema entochen avon in onn. Lu ein ils dus presidents communals novs Martin Cavegn e René Epp segli els stadals. Communablamein cullas pendicularas d’Andermatt-Sedrun e Mustér han els anflau ina soluziun: Mintga indigen astga serender gratuitamein cullas pendicularas sil cuolm duront siat dis dil zercladur entochen la fin d’october.

Legreivlas cefras

Sin damonda dalla FMR han ils dus presidents communals tratg bilanza da quella purschida. A Mustér han 727 indigens priu la carta gratuita, a Tujetsch 386. Il diember total da 1113 fa surstar Martin Cavegn: «Nus savevan ch’il basegns per ina tala purschida era gronds. Che tons retilien la carta gia l’emprema stad ei tonaton ina surpresa.» Collega René Epp dat ella medema crena: «Nus essan fetg cuntents ed ils biars resuns positivs dalla populaziun muossan ch’igl ei stau necessari da porscher quella carta.» Quei ha era il directur dallas Pendicularas Mustér SA, Stefan Arnold, sentiu: «Enviers nus ein buca aschi biars s’exprimi. Mo ei ha buca dau reclamaziuns e gliez ei gia in bien indezi che la glieud seigi cuntenta.»

Menau statistica

Sco giavischau dallas vischnauncas ein las cartas vegnidas returnadas per gronda part igl atun. Sin fundament dallas registraziuns ha saviu vegnir constatau da tgei pendiculara ch’igl ei vegniu fatg diever il pli stedi. «La pendiculara a Caischavedra ei vegnida nezegiada il pli fetg, suandada da quella sil Cuolm da Vi, la pendiculara sil Schneehühnerstock e quella sil Gütsch», constatescha René Epp. Biars han nezegiau la carta in ni dus dis, paucs ein serendi gratuitamein sil cuolm tut ils siat dis pusseivels. «La pendiculara da Sedrun sil Cuolm da Vi nezegian biars era la dumengia per in apero. Van ensi ed engiu aunc avon gentar», di Martin Cavegn. El puntuescha: «Quella pendiculara vegn appreziada fetg dils Tuatschins.» Schegie che las pendicularas han offeriu quella carta gratuita, han era ellas profitau empauet da quella purschida. «Secapescha che bein enqualin ha era consumau tier nus sil cuolm», di Stefan Arnold. Ina dallas finamiras da quella carta seigi ei d’animar ils indigens da cumprar igl abonnament digl onn. Culla carta gratuita ha saviu vegnir fatg diever siat dis da mintgamai maximum duas pendicularas.

Collaboraziun vivida

La stad vegnenta vegn quella purschida gratuita danovamein offerida als indigens. Il diember da dis vegn denton reducius da siat sin tschun. «Nus havein constatau che fetg paucs ein stai siat dis sil cuolm cun quella carta gratuita. Per quei motiv havein nus decidiu da far ina reducziun», di René Epp. Il mument vegn fatg ponderaziuns da scaffir in’app per la carta. Aschia savess quella era vegnir retratga en fuorma digitala. Il meinafatschenta da d’Andermatt Sedrun Disentis Marketing SA, Pascal Schär, vesa en quella carta buca mo in’excellenta purschida pils indigens, mobein era in’avischinaziun dils acturs: «Pendicularas e vischnauncas muossan ch’ellas san cooperar bein. Quei ei fetg productiv era pigl avegnir.» Da quei meini ein era ils presidents communals e Stefan Arnold constatescha che la collaboraziun cullas vischnauncas ei semigliurada considerablamein il davos temps.

Investiziuns en scursalera, casa da parcar, restaurants e dependance a Mustér

Pil restaurant niev sil Cuolm da Vi duessen las Pendicularas Mustér SA survegnir la lubientscha da baghegiar dalla vischnaunca da Tujetsch las proximas jamnas. «Dil cantun havein nus survegniu glisch verda per quella damonda», di il president communal Martin Cavegn. Tenor Stefan Arnold eis ei previu da realisar quei baghetg igl onn 2024. Avon ein aunc auters gronds projects sin rucca tier las Pendicularas Mustér SA, tut en tut setracta ei d’investiziuns d’ulteriurs diesch milliuns francs. Questa stad vegn il restaurant a Caischavedra engrondius e parallel vegn realisau la casa da parcar a S. Catrina. Tenor il directur Stefan Arnold vegn la dependance sper il hotel Baur – la casa da persunal – sanada. Igl onn 2023 quentan las pendicularas realisar ina scursalera cun ina lunghezia da rodund 750 meters a Caischavedra. «Quei ei in’ulteriura purschida da stad ed unviern per in e scadin, surtut per famiglias. Cun quella augmentein nus era l’offerta per temps cun meins bun’aura», di Stefan Arnold.