News-Details

Anavos allas cefras neras

14.09.2022

Hans Huonder/FMR

Semigliuradas ein surtut las entradas sil sectur dil traffic. Quellas ein carschidas da 3,7 sin 4,7 milliuns francs. Hotellaria e gastronomia ein carschidas per biebein 300 000 francs sin 9,77 milliuns francs. Suenter las expensas, tscheins e deducziuns resulta in gudogn da rodund 11 200 francs tier in cash flow da circa 1,5 milliuns francs. Igl onn precedent havevan las Pendicularas Mustér SA aunc fatg ina sperdita da rodund  540 000 francs.

In’excellenta stad 2021

Sco quei ch’il president dil cussegl d’administraziun Marcus Weber constatescha el rapport annual ch’ei vegnius publicaus quels dis en vesta alla radunonza generala dils acziunaris dils 7 d’october 2022, ei igl onn da fatschenta passau staus in dils megliers ella historia dallas Pendicularas Mustér SA. Quei seigi stau il cass malgrad che las restricziuns da corona hagien era accumpignau igl unviern passau. «Igl onn da fatschenta 2021/22 ha entschiet cun in’excellenta stad. Aunc mai havein nus giu tons hosps a Mustér dapi ch’il hotel Acla da Fontauna ei vegnius serraus», constatescha Marcus Weber. Cull’introducziun da pliras attracziuns, denter auter il flow trail a Caischavedra, han las pendicularas augmentau la purschida. El rom digl engaschament el team da mountainbike da Ralf Näf han las pendicularas fatg la destinaziun Mustér aunc pli enconuschenta: «Jeu selegrel mintga ga d’udir da hosps che vegnan l’emprema ga a Mustér, con fantasticas che la cuntrada e l’infrastructura seigien.» Igl unviern ei staus signaus trasatras d’ina munconza da neiv. Per cumpensar quella hagien collaboraturas e collaboraturs stuiu s’engaschar da camifo per procurar per bunas cundiziuns da pista.

Projects e buna collaboraziun

Parallalmein spel menaschi ordinari han las Pendicularas Mustér SA cuntinuau cullas investiziuns. Aschia ei la tiarza casa da persunal vegnida terminada e per la segirtad encunter lavinas ei vegniu cuntinuau cun lavurs da manteniment. La primavera 2022 ei vegniu entschiet cullas lavurs vid la nova casa da parcar. En planisaziun ei il mument l’engrondaziun e sanaziun dalla staziun da cuolm a Caischavedra sco era il baghetg niev per gastronomia sil Cuolm da Vi. Tenor Marcus Weber ei la collaboraziun cun las autoritads indigenas semigliurada e cun Sedrun Mustér Turissem vulan las pendicularas collaborar aunc pli stretg igl avegnir. Pertuccont igl engaschament da Vail Resort Inc. ad Andermatt Sedrun di Marcus Weber: «Tier nus semida nuot. La collaboraziun vegn cuntinuada senza midadas. Ils hosps ed indigens da Mustér e Tujetsch san retrer vinavon ina carta stagiunala ch’includa era la Viafier Matterhorn Gottard d’Andermatt entochen Mustér.