News-Details

Biaras han purtau – paucas han brattau

11.01.2023

Hans Huonder/FMR

Il Center sursilvan d’agricultura promova il dialog denter l’agricultura da muntogna, il turissem persistent ed il commerci local. Quei fan las duas responsablas persuenter, Alma Defuns e sia feglia Nina, cun differents arranschaments da sentupada ed informaziun. (Mira era box.) Dapi biebein treis onns ein ellas responsablas persuenter ed il medem mument era per la purschida ell’Academia Vivian a Stagias sin intschess dalla vischnaunca da Medel. La sonda vargada han ellas purschiu in’acziun tut speciala alla glieud. Ellas han numnadamein organisau ina buorsa da brattar vestgadira. L’inspiraziun per quell’idea ei vegnida ad Alma Defuns enten mirar ella scaffa da resti da sia feglia Tiziana: «Ella ha bugen fetg bia vestgadira, sco jeu havevel era pli baul. Ei va denton era cun bia pli pauc.» Oz prefereschi ella dameins vestgadira, persuenter empau da meglier qualitad: «Enzacons paucs tocs che selaian cumbinar bastan era.»

Bia bien resti

Rodund duas uras suenter che la buorsa ha aviert sias portas ella sala dil Center sursilvan d’agricultura eran las meisas semtgadas persuenter cuvretgas cumpleinamein cun vestgadira, calzers ed era tastgas. «Nus havein buca quintau cun tonta rauba, per part ei la glieud vegnida cun tastgas pleinas. Igl ei tut rauba da buna qualitad, schubra e tgirada bein», di Nina Defuns. Ella seigi surstada dil bi diember da persunas – oravontut dunnas – che hagien purtau la vestgadira. Ton indigens sco jasters hagien nezegiau la caschun. «Nus havein sentiu ch’ina ni l’autra ei vegnida cun rauba per saver sedistaccar da quella», constatescha la conorganisatura. Nuotatonmeins hagien ellas sentiu il plascher dalla glieud da surdar la vestgadira ed era da mirar quella dils auters per forsa tuttina brattar in toc ni l’auter.

In nez era igl avegnir

La rauba ch’ei buca vegnida brattada surdat il Center sursilvan d’agricultura ad organisaziuns caritativas ni alla rimnada ufficiala da vestgadira: «Nus patertgein denton era vid in sustegn per fugitivs dall’Ucraina ni da saver surdar empau resti directamein pil transport ell’Ucraina.» Cull’acziun da brattar vestgadira han Alma e Nina Defuns vuliu sensibilisar la glieud per in diever persistent dalla rauba: «Per biars ha in puli ni ina camischa ina historia speciala ed aschia sa quella vestgadira survir vinavon ad enzatgi che ha plascher ni da basegns dad ella.» Cul film «The true cost – Der Preis der Mode» ch’ei vegnius mussaus la sonda suenter miezdi ha il Center sursilvan d’agricultura vuliu sensibilisar la glieud per quella tematica. Sco quei che Alma Defuns di, duei quell’acziun haver ina cuntinuaziun: «Quei ei nossa finamira. Las empremas experientschas che nus havein fatg ein en mintga cass fetg positivas.»

Arranschaments vegnents

Las proximas jamnas organisescha il Center sursilvan d’agricultura differents arranschaments en sia sala a Mustér/Salaplauna.

Ils 19 da schaner 2023 ei il president dil Cussegl naziunal, Martin Candinas, hosp. Naven dallas 20.00 relata el da sia lavur e siu engaschament politic.

Ils 21 da schaner 2023 vegn mussau il film «Schellenursli». La presentaziun entscheiva allas 17.30.