«Nus havein optimau tut il pusseivel per ch’ei gartegi»
09.05.2023
Susi Rothmund/fmr
«Nus stuein buc exnum emplenir la halla, sche nus vegnin da cuvierer ils cuosts, essan nus cuntents», di Florian Zanin , il president dil comite d’organisaziun digl Indoor Festival a Mustér. Quel ha liug la proxima fin d’jamna per l’endischavla ga. La dieschavla ediziun ha giu liug igl onn vargau suenter ina pausa dad endisch onns. Cun in publicum da sulet 900 persunas (ina part da quels aunc cun bigliets gratuits) ei quei plitost stau in flop. Malgrad in deficit da 10 000 francs ha il comite d’organisaziun teniu la dira e decidiu da cuntinuar. Mo daco propi? «Nus lein porscher enzatgei a nossa giuventetgna e secapescha era ad autras generaziuns che han plascher dalla musica moderna», rispunda Florian Zanin.
«After-Show-Party»
Ils treis fegls dil president dil comite d’organisaziun ein denter 16 e 22 onns vegls – ed els e lur amitgs pon dar buns inputs als organisaturs digl Indoor Festival. «Ei san tgei che la giuventetgna teidla bugen ed aschia sperein nus d’haver in program che attira biaras visitadras e visitaders. Il venderdis havein nus Gigi, EAZ e Pronto, ei dat pia ina sera da rap e hiphop oravontut per la giuventetgna. La sonda havein nus engaschau Bligg ch’ei nossa ‹bumba›. Era Giganto enconuschan praticamein tuts Romontschs e Kamrad ei miu favorit persunal ch’ins auda savens al radio. Sia canzun ‹I Believe› ei ina veritabla himna dil pop», aschia Florian Zanin.
Adattau ed optimau
Suenter il festival dil 2022 han ils organisaturs fatg ina retscherca e tschentau enqual damonda a visitaders e buca visitaders. 177 han rispundiu il questiunari ed ils puncts impurtonts ch’ei han giavischau d’adattar ein vegni risguardai. «Per l’ina han fetg biars giavischau ina ‹After-Show-Party› cun musica d’in DJ e per l’autra ha ei dau dabia critica pertuccond il prezi d’entrada», condeda Florian Zanin. Als davos festivals hagi ei bein era dau ina party suenter ils concerts, denton senza DJ e mo cun musica ch’ei hagien sez elegiu. «Sin giavisch dils visitaders havein nus engaschau uonn in DJ. Dapi il 2021 ei il giuven grischun Gianni Brusch da viadi sco DJ ed ei gia fetg enconuschents ella Svizra digl Ost», declara Zanin. Il prezi pils bigliets d’entrada ei vegnius reducius da 99 francs per dus dis sin 79 francs.
Referats ella regiun
Il comite d’organisaziun digl Indoor Festival ha visitau entginas uniuns da giuventetgna dalla Cadi ed era ella scola a Mustér han ei teniu in referat. «Nossa finamira ei da presentar l’idea dil festival, da declerar co ei funcziuna d’organisar tut e d’anflar bands adattadas e pagablas, mo era da mussar co in budget per ina tala occurrenza vesa ora», declara Zanin. Aschia capeschien ei plitost ch’ei sappien buc engaschar a Mustér bands da renum ch’emplenessien entirs stadiuns. Tuttina – cun Bligg e tut las autras bands speran ils organisaturs da puder attrer almeins 500 persunas per sera. «Plaz ha ei per maximalmein 1000 persunas – quei fuss secapescha genial, sche tons vegnessan», di el e declara ch’ei hagien in budget da 140 000 francs pil festival, inclus ils 10 000 deficit digl onn vargau. «Nossa finamira ei in quen ulivau, far gudogn stuein nus buc», puntuescha Florian Zanin. E co va ei vinavon, sch’ei dess era uonn mo paucas visitadras e visitaders? – «Quei sperel jeu secapescha buc. Mo sch’ei fuss propi aschia stuessan nus ir suls cudischs e ponderar sch’ei fuss stau il davos Indoor Festival.»
Program
Venderdis, ils 12 da matg 2023
20:00 – avertura
20:45 – Gigi
22:00 – EAZ
23:30 – Pronto
00:30 – DJ Gianz (After-Show-Party)
03:00 – fin
Sonda, ils 13 da matg 2023
19:15 – avertura
20:00 – Giganto
21:30 – Kamrad
23:00 – Bligg
00:30 – DJ Gianz (After-Show-Party)
03:00 – fin
* Ulteriuras informaziun: www.indoorfestival.ch; prevendita: www.ticketmaster.ch