Dapi 10 onns dat ei la Canorta d’affons pigns Lumpazi

Il meins d’uost 2023 festivescha la Canorta d’affons pigns Lumpazi a Mustér il giubileum da 10 onns. Quei tierm nezegian il team dalla canorta ed il cussegl dils geniturs per ina purschida speciala. Communablamein han els scaffiu in program variont pils affons cun ni senza accumpignament da carschi. L’enzenna dalla purschida ei la cefra 10.

10 sco enzenna

Naven dil settember 2023 ha liug mintga dieschavel di dil meins duront diesch meins in’activitad pils affons. Quella vegn purschida a tuttas famiglias cun affons ella canorta. Ina part dil program ei denton era ina purschida cun arranschaments publics per tuts interessai. Sco quei che las responsablas pil program scrivan en ina communicaziun als mieds da massa, vulan ellas tener tschelau pil mument ina part da quella purschida. Autras parts vegnan gia communicadas sco per exempel il caffè pils geniturs ils 10 da schaner 2024.

Lu era la participaziun al til da tscheiver ils 10 da fevrer 2024 e sco high-light ils 10 da november 2023 in gala-dinner cun caracter da charity. Entginas parts dil program vegnan festivadas communablamein culla Fundaziun «Tür auf – mo vinavon» che sa festivar il giubileum da 33 onns igl onn 2024. Las informaziuns detagliadas davart las activitads dalla Canorta d’affons Lumpazi vegnan communicadas successivamein.

A Mustér e Trun

La Canorta d’affons pigns Lumpazi ei ina gruppa dalla Fundaziun «Tür auf – mo vinavon». La fundaziun porscha plirs projects da natira sociala e culturala ella Cadi. Ella Canorta Lumpazi vegnan affons ella vegliadetgna da treis meins entochen tschun onns survigilai en ina structura dil di cumplementara culla famiglia, respectivamein affons da scoletta entochen la sisavla classa primara en ina structura dil di cumplementara culla scola. La purschida sedrezza a tuts affons independent da naziunalitad, religiun e lungatg. Mintga affon vegn accumpignaus tenor ses basegns e promovius tenor siu svilup. Medemamein porscha la Canorta Lumpazi la survigilonza d’affons externs per singuls mezs dis ni dis entirs. Dapi igl october 2022 dispona la Canorta Lumpazi d’in secund liug da survigilonza ella vischnaunca da Trun. Ella occupa en tut sis persunas en plazza cumpleina, duas persunas en scolaziun, ina praticanta a cuort termin sco era ina «onda» d’affons pigns. (cdm/fmr)