Las cellas veglias ston vegnir sanadas

Martin Gabriel/FMR

«Quellas 18 cellas che nus stuein exnum sanar ein fetg decadentas», di Pader Pirmin Gnädinger , igl anteriur rectur dalla scola claustrala. El accumpogna il project da renovaziun dallas cellas ch’ein situadas ella tiarza e quarta alzada el tract baroc, pia ella part viers ost dalla claustra. «Oz eisi aschia che las stanzas da durmir da nos scolars ein pli cunfortablas che numerusas da nossas atgnas avdonzas.»

Era il niev duei restar sempel

Duront ina cuorta guida tras la clausura claustrala declara Pader Pirmin Gnädinger alla FMR, che las cellas novas vegnian equipadas cun infrastructuras semplas. «Cun la decisiun d’ir en claustra decidin nus paders benedictins era da menar ina veta sempla senza confort, luxus e distracziun. Mintga finiastra ch’ins vesa d’ordeifer en part sura dalla claustra s’auda tier ina cella. La surfatscha media d’ina cella nova ei var 30 meters quadrats. Las veglias cellas ein pli pintgas» Igl anteriur rectur dalla scola claustrala arva la porta d’ina cella bia pli pintga en il tract decadent. «Cheu en quella cella hai jeu viviu igl emprem temps da mia veta claustrala. Ed en quellas cellas veglias habiteschan aunc adina dus confrars, perquei che nus havein buca plaz ella clausura pli nova.»

Differentas cellas e differentas combras

Actualmein ha la claustra da Mustér treis differentas categorias da combras. La gronda gruppa ein las cellas dils 21 commembers dil convent. Lu datti combras per hosps che vegnan per viver in temps en claustra e la tiarza categoria ein combras per passantas e passants. La differenza ei tenor Pader Pirmin Gnädinger las mobiglias. Ella claustra da Mustér vegni il plaz en scadin cass duvraus, accentuescha pader Pirmin che accumpogna il project da sanaziun actual.

Dependents da fauturs

Il convent dils benedictins ha stampau dacuort ina broschura per tschercar donaturs che segidan cun la finanziaziun. Quella broschura vegn buca distribuida el stil grond, mobein ei exponida alla porta dalla claustra. «Ina claustra survegn buca semplamein 4 milliuns francs d’ina banca», manegia pader Pirmin. El ei entraus avon 60 onns en claustra ed enconuscha la miraglia e mintga stanza dalla claustra da Mustér da fundament ensi. «Actualmein savein nus buca finanziar quella renovaziun. Nus essan dependents da donaziuns. E nus fagein pass per pass. En pliras etappas mirein nus da saver realisar era quei project da renovaziun.» Finiu da renovar seigi ei mai en ina claustra, di pader Pirmin alla fin. Cura che las cellas seigien renovadas vegni gia il proxim project.