Negin concept e promotur dalla cultura

Hans Huonder/FMR

Il concept da cultura proponius dalla suprastonza communala al cussegl communal prevedeva d’augmentar las expensas per la cultura per 75 000 francs sin 250 000 francs. Part da quell’expensa futura fuss era staus in import annual da 30 000 francs per in promotur da cultura. Quel havess giu in mandat parzial cun in pensum da 20 %. Il promotur da cultura havess descargau l’administraziun e la suprastonza communala. El havess liquidau mintgamai las damondas per in sustegn finanzial dallas uniuns, fuss denton era vegnius incumbensaus cun promover e dar impuls per arranschaments da cultura en vischnaunca. Il cussegl da vischnaunca ha refusau il concept ed il medem mument il post per la promoziun da cultura cun 9 NA. Sis da 15 cusseglieras e cussegliers ein s’absteni dalla vusch.

«Strusch in resun positiv»

Il concept ch’ei vegnius elavuraus d’ina interpresa e surluvraus ton d’ina gruppa da lavur sco dalla suprastonza communala havess dau novs accents alla cultura, mo era als auters secturs dil temps liber sco il sport. «Il cussegl da vischnaunca ei staus dil meini ch’ei drovi buca quella promoziun e consequentamein era buca dapli mieds finanzials pil temps liber. La suprastonza communala ei trumpada da quella decisiun, tonpli che nus essan sefatschentai intensivamein da quei concept. Nus prendin denton enconuschientscha dalla discussiun ed acceptein secapescha quei resultat», di il president communal René Epp sin damonda dalla FMR. Consequentamein detti ei neginas midadas pertuccont promover las activitads dil temps liber. Medemamein resta la lavur per la direcziun, la suprastonza communala e l’administraziun quella d’entochen ussa: «Ina dallas finamiras era medemamein da reducir la birocrazia.» René Epp constatescha ch’ei ha dau ella seduta dil cussegl da vischnaunca dil mardis sera ton sco negins resuns positivs sil concept: «Autras vischnauncas promovan la cultura ed era tiel cantun Grischun ei quei il cass. Da quels ulteriurs mieds finanzials e dalla lavur dil promotur da cultura havessen nus – ils indigens – profitau.»