GOLDEN CARD – la nova purschida per persunas indigenas
Sin iniziativa dallas duas vischnauncas Mustér e Tujetsch eis ei suenter varga dus onns contractivas gartegiau da lantschar la «Golden Card», ina purschida unica per nos indigens.
Naven da mesjamna, ils 28 da matg 2025 han persunas cun domicil da habitar e da taglia en ina dallas vischnauncas Disentis/Mustér, Tujetsch, Andermatt, Realp e Hospental la pusseivladad da retrer la nova carta per indigens «Golden Card» tier las pendicularas a Mustér ed Andermatt ni tier il biro da turissem da SDT a Sedrun.
La premissa per saver retrer la carta ei ina confirmaziun da domicil per tuttas persunas (era per affons). Per persunas cun domicil a Mustér ei quella confirmaziun disponibla al spurtegl dalla vischnaunca ni online sur la pagina d’internet dalla vischnaunca (www.disentis.ch/golden-card).
La carta per persunas indigenas possibilitescha al possessur da far diever gratuitamein dad ina gronda part dallas purschidas da sport e temps liber dalla regiun turistica Mustér-Sedrun-Andermatt:
- Territori da skis Andermatt Sedrun Disentis/Mustér (entir onn)
- Mo igl unviern – Matterhorn Gotthard Bahn denter Mustér ed Andermatt
- Bogn Sedrun (bogn cuvretg e wellness)
- Center Fontauna (fitness, reiver, badminton, minigolf)
- Tennis Center Fontauna e Sedrun (indoor ed outdoor)
- Loipas da cuorsa liunga Val d’Ursera, Sedrun e Nordic Surselva (Mustér entochen Trun)
- Patineras ad Andermatt, Sedrun e Mustér
- Museums: Talmuseum Ursern, museum dalla claustra Mustér, museum Cristallina Mustér, museum La Truaisch Sedrun
- Bus locals a Val d’Ursera, Sedrun e Mustér
- Driving-Range Club da golf Sedrun
Prezi dalla Golden Card:
- Carschi naven dil 16avel onn: frs. 333.-
- Affons 6-15 onns: frs. 33.-
- Affons entochen 5 onns: gratuit
La Golden Card ei ina purschida dallas vischnauncas da Tujetsch, Disentis/Mustér, Andermatt, Realp e Hospental ensemen cun differents partenaris per promover il svilup local.
