News-Details

Pro­cess ra­ziu­nals ed aul­ta qua­li­tad

11.05.2017

Da Hans Huonder / anr

La Distec SA a Mustér investescha danovamein en siu parc da maschinas ed apparaturas. Pil directur Loris Marsura ei quei indispensabel, vul l’interpresa restar concurrenzabla, alla testa dalla tecnica ed aschia porscher allas collaboraturas ed als collaboraturs bunas cundiziuns da lavur. «Nus luvrein en ina regiun perifera e per restar concurrenzabels stuein nus far sforzs specials», di Marsura. Sper in stab da collaboraturas e collaboraturs qualificai ein process raziunals ed in parc da maschinas d’aulta qualitad indispensabels per saver luvrar cun aulta precisiun. Per quei motiv ha la Distec SA decidiu d’investar ina gronda summa era uonn en siu menaschi. Las investiziuns dad 1,5 milliuns francs duein aschia gidar a garantir igl avegnir dall’interpresa. Ils proxims meins eis ei previu d’investar ell’automatisaziun, la segirtad dalla qualitad ed il parc da maschinas. Ella partiziun dall’automatisaziun vegn installau in niev roboter Fanuc cun 12 plazs per palettas. Aschia eis ei pusseivel da producir pli efficient. Las investiziuns ella pli nova tecnica e precisiun da mesirar, cumbinada cun in’engrondaziun e niev indrez da climatisaziun dil local da mesiraziun, duein porscher cundiziuns da lavur maximalas en favur dalla segirtad dalla qualitad. Il parc da maschinas vegn cumpletaus questa stad cun ina maschina d’aulta spertadad dil tip Makino. Ils centers d’elavuraziun Makino ein ils megliers dil mund e porschan la precisiun absoluta per lavurs da fresa. La Distec SA porscha occupaziun a 75 persunas. Da quei ein 20 egl emprendissadi. L’interpresa ei adina puspei alla tscherca da persunal qualificau. Tenor Marsura ei quei il mument per exempel ina persuna pil sectur administrativ che dispona era d’experientscha sil sectur dalla producziun.