News-Details

Giubileum da 10 onns cun empau retard

07.05.2020

Igl onn 2012 havess igl Indoor Festival a Mustér giu liug per la dieschavla ga. Aschilunsch eis ei denton buca vegniu. Quei giubileum festiveschan ils organisaturs uss igl onn vegnent e laian aschia renescher quei eveniment da musica el Center da sport e cultura. Gruppas da musica dalla Svizra e digl exteriur – per part era da grond renum – ein stadas d’udir ils onns 2003 entochen 2011 agl Indoor Festival a Mustér. Lu eis ei denton stau finiu cun quei spitachel. «Il davos onn havein nus fatg in grond deficit cul menaschi e quei ha priu la motivaziun», di Florian Zanin che presidiescha il comite d’organisaziun dil dieschavel festival ch’ha liug ils 7 ed 8 da matg 2021. Il davos onn ha la glieud muncau: «Forsa havein nus buca giu las dretgas gruppas.» En mintga cass sa vegnir festivau l’auter onn il giubileum da 10 onns digl Indoor Festival e quei cun in retard d’exact diesch onns.

Ina nov’entschatta
Da niev ha il festival buca liug pli la fin da mars ni l’entschatta avrel, mobein il matg. Quei ha differents motivs. «Il matg ei il Pass dall’Alpsu aviarts ed aschia savein nus era plidentar glieud el cantun Uri e la Svizra centrala. En quei senn sedat per nus ina nova fiera», di Zanin. Al comite d’organisaziun appartegnan entgins ch’ein gia stai conorganisaturs, per gronda part ein denton da cattar novas fatschas en quei gremi: «Quels ch’ein stai el comite tschellas gadas ein puspei vegni dumandai, entgins ein promts da collaborar. Igl ei denton era stau claramein l’idea d’involver autra glieud cun novas ideas.» L’uniun sco purtadra dil festival era vegnida sligiada si, uss eis ella vegnida fundada da niev cul num Indoor Festival 2.0. Ch’ins ha salvau il num d’antruras ha per Zanin clars motivs: «Indoor Festival ei aunc adina bein enconuschent e duront nov onns ei il num staus aschidadir ina noziun, ina marca.» Il program ei aunc buc avanzaus concretamein, aschia ch’il comite sa communicar pér pli
tard tgei gruppas che vegnan ad esser d’udir. Che quei ei aschia attribuescha il president dil comite d’organisaziun alla situaziun actuala cul coronavirus.

Detagls pli tard
«Nus essan fetg baul vidlunder cull’organisaziun, tschels onns entscheveva la lavur rodund nov meins avon il festival. Uonn vegn quei buc ad esser auter, surtut era pervia dalla malsegirtad cul coronavirus», di Zanin. Quei vala era per la tscherca da sponsurs: «Nus havein giu contacts, mo havein sentiu las davosas jamnas che las malsegirtads ein era grondas tier las interpresas.» Il budget quenta cun ina sviulta da 155 000 francs. In ei denton gia ussa clar: Igl ei previu da porscher duas seras cun bia musica. Eventualmein duei era vegnir offeriu in concert ni l’auter duront il di enzanua el vitg. «Tschels onns organisavan nus aunc concerts el territori da skis, mo damai che nus fagein il festival il matg vegn quei buca pli ad esser pusseivel. Medemamein lessen nus empruar da nezegiar las sinergias, vul dir era porscher in program da rama il di ora, per exempel la caschun d’ir cun bike», di Zanin ch’ei fiug e flomma pil proxim Indoor Festival. Ponderaziuns fan ils organisaturs era concernent eventualas restricziuns pervia dil coronavirus: «Eventualmein vegnin nus a stuer limitar il diember da visitaders, mo quei vegn a semussar ils proxims meins. Nus essan denton optimists e sperein da saver porscher igl Indoor Festival il matg 2021.» Medemamein vegnan ils organisaturs a stuer prender risguard d’eventualas midadas el Center da sport e cultura: «Quei dependa era co ei va vinavon cul project ch’ei leu sin rucca.» Ils organisaturs prevedan da contactar ils hotels per la dimora dallas visitadras e dils visitaders, gest tenor disponibladad duei era vegnir purschiu caschuns da star sur notg el Center da sport e cultura.