News-Details

La Gruppa da teater Mustér presenta il toc humoristic «Il pli tup mument»

30.12.2015

La Gruppa da teater Mustér ei prest 30 onns veglia. Ella ei seformada ils onns ch’il teater popular haveva entschiet a serestrenscher sin singuls loghens en Surselva. Dapi lu eis ella ina da paucas ella regiun che sepresenta mintg’onn alla tribuna. Che quei ei pusseivel ei d’engraziar ad ina gruppa da struschamein diesch giugaduras e giugadurs che surprendan mintg’onn ina ni l’autra rolla.

Grev d’anflar novs giugadurs
Sco autras uniuns – dil reminent buca mo da teater – ha era la Gruppa da teater Mustér difficultads d’anflar novas acturas e novs acturs. «Biars vulan semplamein buca seligiar ed esser en in’uniun. Quei ei il cass tier la giuventetgna, mo era tier auters», di Sigisbert Beer che presidiescha la gruppa dapi diesch onns e che meina uonn per la sisavla ga reschia. Avon entgins onns era ei reussiu alla gruppa d’animar entgins giuvens da far teater. Per motivs da scola, professiun ni famiglia ein els ussa buca pli dalla partida. «Il diember d’activs che nus essan il mument tonscha per presentar ina cumedia. Quei mument che nus havein lu veramein difficultads, vegnin nus a stuer agir activamein, vul dir plidentar in ni l’auter da vegnir a far teater cun nus. Igl ei adina puspei semussau ch’igl interess persuenter fuss avon maun, mo il pass decisiv ella gruppa succeda lu tonaton buca, forsa era pervia da retenientschas», constatescha Sigisbert Beer. Per promover ils affons pil teater organisescha la gruppa era igl unviern vegnent puspei ina presentaziun ni l’autra.

Rolla dubla
La rolla dubla che Sigisbert Beer ademplescha sco president e reschissur pretenda engaschi cumplein en favur dalla gruppa: «Ei dat adina puspei caussas che pertuccan ton il president sco il reschissur e lu va quei enina.» Igl onn vargau ha Tina Bundi menau reschia, uonn puspei Sigisbert Beer: «Nus lessen sebrattar era igl avegnir, pertgei nus fagein omisdus fetg bugen teater. La rolla sco actur sin tribuna ei per mei pli biala. Leu eis Ti responsabels per tetez, sco reschissur per tuts.» Sper ils activs che sepresentan regularmein sin tribuna dispona la gruppa era d’entgins fideivels commembers seniors che procuran onn per onn la tribuna e la tecnica, sco era da gidontras e gidonters davos las culissas.

Fideivels alla cumedia
Che la Gruppa da teater Mustér ei sedecidida era per quest unviern per ina cumedia ha in motiv principal. «Nus havein giu bien success cun nossas cumedias ils davos onns. Daco duessen nus lu midar enzatgei che plai alla glieud», di Sigisbert Beer. Las cumedias dils davos onns han giu parallelas en lur cuntegn e stil. Quei vul il president e reschissur midar: «Nus essan alla tscherca d’ina nova casa editura. Lein mirar, forsa sedat ina midada cheutras.» La cumedia che vegn presentada il schaner e che porta il tetel «Il pli tup mument» digl autur Andreas Kessner cun translaziun per romontsch d’Alexi Monn, raquenta la historia dalla vieua Erna Moser che viva en in agen mund dapi la mort tragica da siu mariu. Aschia festivescha ella era il natalezi da 66 onns da lez. Gest quei di cumpara in cussegliader da segiradas che less pagar ora ina segirada da veta per Paul Moser. Pagar il miez milliun paga la segirada da veta denton mo sch’il segirau viva aunc e Beat Sommer dalla segirada ha l’incarica da sclarir, sche quei ei il cass. Ed ussa entscheiva la cumedia: Nua ir alla sperta per in um che viva aunc? Il fegl Daniel ha l’idea da dumandar il vischin Willi da giugar la rolla dil bab. Il Willi ei aschia ni aschia inamuraus ella mumma e va la finala d’accord da surprender quella rolla. Tut para dad ir bein, mo lu dat ei surpresas.

Uniun grischuna sin viseta
Igl onn 2016 stat tier la Gruppa da teater Mustér buca mo ell’enzenna dalla cumedia „Il pli tup mument“. La fin avrel organisescha ella era la radunonza da delegai dall’Uniun grischuna per il teater popular. Quella ei vegnida fundada 1980 e s’engascha per producziuns da teater ellas regiuns e promova il contact denter las gruppas da teater dil Grischun. Medemamein offerescha ella scolaziun supplementara e cuors da teater e promova il teater per giuvens, affons, seniors ed impedi. L‘uniun dumbra biebein 60 gruppas ed uniuns. La Gruppa da teater Mustér segida era vid l’organisaziun dalla Biennale svizra dil teater d’amaturs ils 15 e 16 d’october 2016 a Sagogn.

Presentaziuns en halla Cons a Mustér: Sonda, 9 da schaner 2016 allas 20.00; venderdis, 15 da schaner 2016 allas 20.00; sonda, 16 da schaner 2016 allas 20.00; dumengia, 17 da schaner 2016 allas 14.00; venderdis, 22 da schaner 2016 allas 20.00; sonda, 23 da schaner 2016 allas 20.00. Reservaziun da plaz mintga di allas 17–20 uras per telefon 081 947 50 29.