News-Details

Conferenza davart la perscrutaziun dall’energia en regiuns da muntogna a Mustér

05.01.2016

La producziun, respectivamein il commerci ed il prezi dall’energia fatschentan buca mo las interpresas ch’ein directamein pertuccadas, mobein era la politica e la fin finala il singul consument. Dapi la catastrofa ell’ovra nucleara da Fukushima el Giapun avon prest tschun onns han plirs stadis midau lur strategia d’energia futura. Ton la Germania sco la Svizra han per exempel concludiu da bandunar cul temps la producziun d’energia atomara. Quella strategia ei cumbinada cun grondas sfidas. En Svizra vegn discutau sil pli ault scalem politic davart la «Strategia d’energia 2050». In grond tema ein las midadas previdas era ellas medias. Representants dalla politica e dall’energia s’annunzian leu e presentan lur pugns da vesta davart l’economia d’energia. La confederaziun promova la perscrutaziun dall’energia ed appellescha allas universitads da collaborar. La finamira: Sustener la midada dall’energia. Las midadas enteifer la branscha d’energia han success sulettamein sche politica, administraziun, perscrutaziun ed economia d’energia tilan tuts per il medem sughet.

Porscher maun
Per in’ulteriura ga sefatschenta in arranschament a Mustér digl avegnir dil sectur dall’energia. Dils 27 entochen ils 29 da schaner 2016 s’entaupan perscrutaders dall’entira Europa allas «Discussiuns davart la perscrutaziun d’energia» sisum la Surselva. El center digl arranschament stattan temas actuals che pertuccan l’energia. En connex cun quella sentupada porschan ils organisaturs era ina dieta publica. Quella ha liug gievgia, ils 28 da schaner 2016 ella Sala Peter Kaiser. A quei arranschament san tuttas persunas cun interess vid ils fatgs d’energia separticipar. Referentas e referents dalla Svizra e digl exteriur presentan ils pli novs resultats dalla perscrutaziun ch’ein d’interess oravontut per las regiuns da muntogna. Medemamein seporscha la caschun da discutar cun las referentas ed ils referents. Las «Discussiuns davart la perscrutaziun d’energia 2016» a Mustér cun igl arranschament public vegnan organisadas da Nadja Germann dall’Universitad Lucerna e dalla professoressa assistenta dall’Universitad S. Gagl, Florentina Paraschiv. L’occurrenza vegn sustenida dallas vischnauncas da Mustér, Medel e Tujetsch sco era dil Swiss Energy Podium Mustér.

Temas actuals
Las «Discussiuns davart la perscrutaziun d’energia 2016» ein in ulteriur arranschament che sefatschenta intensivamein dall’energia a Mustér. Gia duas gadas ha il Swiss Energy Podium Mustér purschiu la caschun a tuts interessents dils fatgs d’energia da s’informar davart las novitads sin quei sectur. Igl onn 2013 ei igl emprem Swiss Energy Podium sefatschentaus dil lenn sco resursa per la producziun d’energia. Quels referats ein stai en connex cun l’avertura dil scaldment central cun reit a distanza Recal. Avon in onn han ils organisaturs dil Swiss Energy Podium allura purschiu referats davart la forza hidraulica. El center ei stada la damonda davart igl avegnir da quella energia regenerabla ch’ei buca mo da gronda impurtonza per la segirtad dil provediment d’energia en Svizra, mobein era ina fontauna finanziala da gronda muntada per biaras vischnauncas e cantuns. In dils referents ei il directur digl Uffeci federal per energia, Walter Steinmann, staus. Las «Discussiuns davart la perscrutaziun d’energia 2016» a Mustér ein ina buna cumpletaziun e cuntinuaziun da quella retscha. Per quei motiv sustegn il Swiss Energy Podium Mustér lu era ils organisaturs en lur stentas.

Annunzias per igl arranschament public dallas «Discussiuns davart la perscrutaziun d’energia 2016» a Mustér san vegir fatgas tier simone.stieger@unilu.ch (telefon 041 229 53 27) ni sin la homepage www.swiss-energy-podium.ch. Sin quella homepage ei igl entir program da cattar. La participaziun cuosta 150 francs. Cumpriu ein tut ils referats, documentaziun dalla dieta e proviant.