News-Details

La ven­di­ta le­ven­ta no­va spe­ron­za

01.02.2017

Avon exactamein 20 onns ha l’Intersoc communicau al possessur dil hotel Acla da Fontauna da lu Arnold Mathis sco era alla vischnaunca da Mustér ch’ella vegni buc a prolungir il contract d’affittaziun. Dapi lu vegn tschercau soluziuns pil hotel e pigl areal. Ussa para ei da dar niev slontsch ad ­Acla da Fontauna. Il gliendisdis ha la Banca Cantunala Grischuna communicau ch’ella hagi vendiu la parcella cul hotel Acla da Fontauna a Mustér, inclusiv ­duas ulteriuras parcellas, alla «Societad da svilup dil project Acla da Fontauna» cun sedia a Maiavilla. A quella appartegnan la «Due Sentieri SA», la Brandis Investment SA e la Miro Immobilien SA. La societad haveva dapi otg onns il dretg da cumpra digl areal. Ussa ha ella fatg diever da quel. La finamira ei d’ereger leu ina nova surbaghegiada. Sco quei che Franz Hidber dalla «Due Sentieri SA» di sa la planisaziun dils baghetgs novs ir en differentas direcziuns. Per la surbaghegiada planisada il davos ei la lubientscha da baghegiar avon maun. Schebein quei project vegn realisaus ei denton aunc buca clar, igl ei era pusseivel ch’ei dat midadas vid quel.

Nova speronza

Sco quei che Hidber ha detg enviers l’Agentura da novitads rumantscha duei il hotel vegl vegnir spazzaus. Cu exact ei aunc buca decidiu e dependa digl urari dil project niev. El constatescha ch’ei ha dau in moviment positiv el svilup turi­stic da Mustér. Cun quei manegia el denter auter las investiziuns previdas dallas pendicularas. Quellas circumstanzias dettien alla societad niev slontsch da cuntinuar cun la projectaziun digl object. Avon dus onns ha la «Societad da svilup dil project Acla da Fontauna» ch’ei la cumpradra dallas parcellas e dil hotel vegl fatg la damonda da baghegiar per ina surbaghegiada cun hotel ed habitaziuns administradas e secundaras e survegniu la lubien­tscha persuenter. La lubientscha ei valeivla, teoreticamein savess vegnir en­tschiet spert cun la realisaziun dalla surbaghegiada. Tenor Hidber eis ei il mument denton buca decidiu sche quella varianta vegn realisada ni in’autra. Igl ­object cun lubientscha da baghegiar preveda in hotel cun 150 combras cun totalmein 300 letgs, 22 habitaziuns admini­stradas e 56 habitaziuns secundaras.

Da beneventar

La novitad ch’il hotel Acla da Fontauna seigi vendius vegn beneventada. «Nus essan leds da tut quei che vegn fatg en favur dil turissem. Ei fa plascher d’udir ch’ei dat glieud che ha confidonza ella regiun», di Giusep Columberg , vicepresident da Sedrun Mustér Turissem e hotelier dalla Furca a Mustér. Senza saver tgei che seigi previu astgien ins taxar quella scumiada da maun per positiva. Columberg constatescha ch’ei po vertir a Mu­stér era in hotel per exempel da quater steilas: «Quei dess era moviment el vitg.» Ella medema crena dat era il president communal Robert Cajacob : «Nus essan vegni orientai ufficialmein il gliendisdis da quella vendita, respectivamein cumpra. Per Mustér ei quei in da sis el lotto, buca mo per quei ch’il baghetg vegl vegn spazzaus, mobein era perquei ch’ils participai vid il project lavuran gia dapi in temps vid soluziuns pigl areal.» El discuors che Cajacob ha giu cun ina delegaziun dalla societad ei semussau che quella vul nezegiar las sinergias cul center da sport e cultura. «Ina eventuala contribuziun dalla vischnaunca vid igl object niev ei il mument negin tema», di Cajacob.

Vit dapi 16 onns

Il december 1997 ha la societad Intersoc communicau al possessur dil hotel Acla da Fontauna Arnold Mathis ed alla vi­schnaunca da Mustér ch’ella vegni buc a prolungir il contract d’affittaziun. La fin da matg 2001 ei il contract spiraus definitivamein e dapi lu ei il hotel vits. Ils megliers onns generava el pressapauc 80 000 pernottaziuns ed era aschia d’eminenta impurtonza turistica per la part su dalla Surselva. Suenter la decisiun dall’Intersoc ein differentas emprovas da reactivar il menaschi ve­gnidas fatgas. Denter auter ha la vi­schnaunca contactau danovamein l’Intersoc e schizun giu l’inten­ziun da cumprar il hotel communablamein cun las Pendicularas Mustér SA e silsuenter da sanar il baghetg erigiu l’en­tschatta dils onns 1970. Quella soluziun ei lu tona­ton buca daventada realitad, schegie ch’il cussegl da vischnaunca haveva concediu la stad 2003 in credit da planisaziun da 100 000 francs. Il cussegl grond haveva schizun dau in credit dad in milliun francs dil cantun cun la cundiziun che la vischnaunca da Mustér separticipeschi medemamein finanzialmein vid la cumpra e la sanaziun dil hotel. Ils 31 da fenadur 2004 ha l’Intersoc communicau definitivamein ch’ella seretili dil project. Igl unviern 2005 ei allura ve­gniu profilau da niev sigl areal Acla da Fontauna. Il project da Medusa SA e Züblin-Strabag SA ei denton era buca reussius. Sco sustegn finanzial haveva la vischnaunca concediu in credit da participaziun dad in milliun francs vid il project. La finamira era da sanar igl exi­stent e da cumpletar el cun dus tetgs da siala. La primavera 2009 ha la «Due Sentieri SA» allura acquistau dalla Banca Cantunala Grischuna il dretg da cumpra per las parcellas ad Acla da Fontauna a Mustér ed uss ei igl areal definitivamein els mauns dad ella, respectivamein dalla «Societad da svilup dil project Acla da Fontauna».