News-Details

Da Müstair a Mustér

09.09.2014

La via dil sid-ost entochen el nord-vest dil cantun Grischun corrispunda alla ruta da viandar nr. 43. Avon diesch onns ei l’uniun sedecidida da far quella empau pli attractiva ed enconuschenta. Igl ei ina da biaras vias da sogn Giachen ell’Europa che meina la fin finala a Santiago di Compostela. Avon sis onns ha l’uniun aviert ufficialmein la via ed ussa ei quella amplificada cun tablas d’informaziun. En novs loghens reparti sin igl entir tschancun da Müstair entochen Mustér ein quellas vegnidas installadas e sper quellas era mintgamai in baun per in paus. En Surselva ei quei denter Vuorz e Breil e lu all’entrada dil vitg da Mustér sper la baselgia da s. Placi.

 

Ruta bein frequentada

Avon exactamein sis onns ei la Via da sogn Giachen vegnida inaugurada ufficialmein a Müstair. Sil di sis onns pli tard ei l’ovra avisada dall’uniun terminada. «Nossa via vegn frequentada pli e pli da viandonts e pelegrins, mo era turists. La varietad culturala mo era la cuntrada da quella ruta ei ina gronda rihezia», di Rudolf E. Trepp, president dall’Uniun Via sogn Giachen dil Grischun. Da Müstair san ils viandonts dil reminent era serender sin la via che meina el Tirol dil sid. Communablamein cun lezza regiun sisum l’Italia ha il Grischun ediu ina carta da panorama cun las duas rutas e cun descripziuns dallas attracziuns agl ur da quellas. All’uniun eis ei reussiu d’animar differentas organisaziuns da turissem e menaschis da hotellaria sper la via da s’engaschar en favur da quella, mo era da propagar ella en lur camps da fatschenta. En 50 loghens san ils pelegrins e viandonts pretender il bus per lur pass ed aschia documentar lur viadis. «En quei senn ei la Via da sogn Giachen atras il Grischun era ina attractiva purschida en favur dil turissem», di Rudolf E. Trepp.

 

Tgi era Giachen insumma?

La boxa cun las broschuras davart las nov etappas ei cumparida exactamein per la finiziun dalla signalisaziun dalla via. En quellas broschuras catta il pelegrin e viandont descripziuns detagliadas davart las attracziuns dalla ruta, mo surtut era informaziuns davart sogn Giachen. Tgi era el insumma e daco serendan aschi biara persunas tier sia fossa a Santiago di Compostela? Las auturas ed ils auturs da quellas broschuras presentan sogn Giachen sco persunalitad dall’entschatta dil cristianissem. Ei vegn skizzau in maletg dalla veta da Giachen en cumbinaziun cun contribuziuns historicas, cussegls per meditaziuns, oraziuns e canzuns. La publicaziun cul num «Jakob entdeckt!» emprova da profundar la spiritualitad el pelegrin sin quella via atras il Grischun. «Possi quella via attrer buca mo ils Grischuns, mobein bia glieud digl entir mund alla tscherca dil senn dalla veta ed aschia porscher als pelegrins e viandonts in’aventura», puntuescha Rudolf E. Trepp. En ina cuorta meditaziun cun entgins buns patratgs en baselgia da s. Placi han avat Vigeli Monn e ser Heiner Nidecker recumandau il venderdis tier la festivitad la via da sogn Giachen alla protecziun da Diu.

 

Informaziuns detagliadas ein da cattar sin www.jakobsweg-gr.ch