News-Details

Di da viandar svizzer 2015 a Mustér

18.09.2014

Il di da viandar naziunal animescha bia glieud da semover ella natira. Il medem mument vivifichescha el il turissem migeivel ellas regiuns ruralas dalla Svizra. La davosa fin d’jamna ha quei arranschament giu liug a Spiez sper il Lag da Thun. Rodund 3000 persunas ein viandadas communablamein cun la moderatura da televisiun Mona Vetsch, la cantadura Francine Jordi ed igl anteriur skiunz Bruno Kernen. Participontas e participonts han nezegiau differentas rutas entuorn il lag. Il di da viandar naziunal vegn purschius dalla «Schweizer Familie».

L’auter onn en Surselva
L’otgavla ediziun da quei arranschament naziunal ha liug a Mustér/Sedrun. Per la candidatura che ha victorisau encunter biars auters concurrents, ei Sedrun Mustér Turissem staus responsabels. Il plascher d’obtener quella occurrenza ei gronds. «Quei che biars enconuschents loghens da da turissem ha empruau, havein nus contonschiu, numnadamein da dumignar il di naziunal da viandar el Grischun. Nus sperein che l’aura segi buna e naturalmein che biaras e biars serendien sisum la Surselva. Las bellezia sendas el contuorn dalla tgina dil Rein ein gia in motiv persuenter», di il meinafatschenta Hans-Kaspar Schwarzenbach. A quei di da viandar naziunal vegn buca mo il Rein ad esser el center da quei che la regiun vul presentar, mobein era la cultura romontscha: «Nus lein propagar il lungatg, las tradiziuns, la cultura e buca il davos era las specialitads ord la cuschina dalla regiun.»

Viandar sco finamira
Il Center da sport e cultura a Mustér ei il liug da sentupada dil di da viandar naziunal 2015. Da cheu anora san las participontas ed ils participonts partir a treis turas definidas entras Heidi Meier da Sedrun Mustér Turissem. La tura leva meina entochen tier la baselgia da s. Gada, la varianta sportiva sin la via da Kneipp e la tura pretensiusa a Mompé Medel entochen Mutschnengia. Mintga excursiun vegn menada d’ina persuna prominenta. Tgi che vul nezegiar ils dis avon ni suenter dalla vasta purschida da viandar sisum la Surselva sa far diever dil «WanderApp» dil Grischun che cuntegn numerusas rutas ed informaziuns per exempel davart attracziuns, ustrias ni prognosas dall’aura. Per la fin dil di da viandar vegn arranschau ina gronda fiasta per hosps ed indigens.

Grond effect da reclama
Da quei arranschament naziunal selegran buca mo ils viandonts. «Quei di ha secapescha in fetg grond effect da reclama entras la communicaziun dalla Gruppa TA-Media. Quella cuosta rodund in miez milliun francs», di Orlando Bergamin da Grischun Vacanzas che procura dapi rodund in onn il marketing per la regiun da vacanzas sisum la Surselva. Representants dallas pendicularas, l’uniun da gastro, l’uniun da commerci e professiun, la Viafier retica e la vischnaunca vegnan formau il proxim temps in comite d’organisaziun. Quel ha ina suletta finamira:  Procurar per ina pruschida singulara che muossa la regiun mo da sia megliera vart ed aschia d’animar ils hosps da returnar. Igl ei previu da crear purschidas pauschalas ed ils visitaders duein era haver la caschun d’emprender d’enconuscher persunalmein ils producents da specialitads localas e secapescha era da degus