News-Details

Sedrun Mustér Turissem ha nudau dameins pernottaziuns igl onn 2013/14

26.09.2014

Tenor la statistica publicada el niev rapport annual ha Sedrun generau la stad 2013 78'830 pernottaziuns e Mustér 119'151. A Sedrun ei quei in minus da rodund 3000 en cumparegliaziun cugl onn avon, a Mustér in plus da rodund 8000. Perencunter ha Sedrun giu ina megliera stagiun d’unviern. Digl emprem da november 2013 entochen la fin d’avrel 2014 ei vegniu nudau en Val Tujetsch 167'659 pernottaziuns ed a Mustér 135'732. A Sedrun sedat aschia in lev plus da rodund 90 pernottaziuns, a Mustér perencunter in minus da rodund 9000 pernottaziuns.

Turissem sco motor

Totalmein han ils dus loghens generau igl onn da fatschenta 2013/14 501‘372 pernottaziuns. Quei ei in minus da 0,7 pertschien enviers igl onn avon. La media da pernottaziuns dils davos tschun onns munta 518‘310. Ferton ch’ils hotels e las habtaziuns cun pauschalas han pudiu tener il nivel digl onn avon, ston las habitaziuns da vacanzas tschaffadas singulamein ed ils camps da giuvenils nudar reducziuns dallas pernottaziuns. Igl onn da fatschenta 2012/13 havevan ils camps registrau 102‘235 pernottaziuns, igl onn passau 95‘747. In clar augment ei vegnius registraus tier ils campadis, numnadamein da 22'823 igl onn 2012/13 sin 28'902 pernottaziuns igl onn 2013/14. Il quen da menaschi da Sedrun Mustér Turissem siara cun ina sperdita da rodund 48'000 francs tier expensas totalas da 1,68 milliuns francs. Il deficit ei la consequenza dallas restructuraziuns. Quellas pertuccan oravontut ils cuosts da persunal ch’ein in bien ton pli aults che budgetai. Per saver ademplir era igl avegnir las incumbensas da marketing, spera Sedrun Mustér Turissem sin l’introducziun dalla nova lescha da turissem. «Il turissem ei per la regiun da Mustér e Sedrun d’immensa impurtonza. Da quel ei nossa beinstonza dependenta per gronda part. Per quei motiv stuein nus adattar nossas structuras e migliurar la collaboraziun denter ils differents purtaders da prestaziun. Quei munta ch’ils interess persunals ston vegnir suttamess tscheu e leu als interess generals», puntuescha il president ad interim, Giusep Columberg, el rapport annual.

Cooperaziun cun Andermatt

Igl onn da fatschenta 2013/14 da Sedrun Mustér Turissem ei staus ell’enzenna da grondas midadas. D’ina vart ei il marketing vegnius surdaus a Grischun Vacanzas, da l’autra vart ei il biro d’informaziun el vitg da Mustér vegnius serraus. Da niev succeda l’informaziun turistica dil spurtegl dalla Viafier retica e dil biro dallas Pendicularas Mustér SA a S. Catrina anora. Sco quei ch’il meinafatschenta Hans-Kaspar Schwarzenbach constatescha el rapport annual gest cumpariu, ha Sedrun Mustér Turissem stuiu nudar gnanc ina suletta reclamaziun da hosps da vacanzas pervia dalla midada da biros. Perencunter hagi ei dau reclamaziuns d’indigens e possessurs da secundas habitaziuns. Malcapientschas seigien stadas savens il motiv persuenter. A Sedrun vegn Sedrun Mustér Turissem a retrer localitads d’informaziun communablamein cun Sedrun Pendicularas SA e cun la scola da skis. Tenor Hans-Kaspar Schwarzenbach seigien las pendicularas da Sedrun buca stadas promtas da surprender ina semeglionta incumbensa sco las pendicularas a Mustér. Sil sectur strategic avisescha Sedrun Mustér Turissem aunc adina ina cooperaziun cun Andermatt. Las discussiuns dil davos temps seigien s’avanzadas. Era dalla vart d’Andermatt seigi la necessitad d’in collaboraziun incontestabla. «In problem resta il num dalla destinaziun ed ina cumparsa unitara, essend che Andermatt ha gest sviluppau ina marca nova», scriva Hans-Kaspar Schwarzenbach. Ina soluziun pusseivla fussien products communabels, sco per exempel ina carta da hosps.

La radunonza generala da Sedrun Mustér Turissem ha liug gievgia, ils 9 d’october 2014 ell’aula dalla casa da scola a Sedrun.