News-Details

Las Pendicularas Mustér SA ston nudar in deficit

01.10.2014

Ils 17 d’october 2014 salvan las Pendicularas Mustér SA lur radunonza generala. Cun occasiun da quella vegn dau plaid e fatg davart igl onn da fatschenta passau ch’ei staus per la davos ga sut l’egida digl acziunari principal, la Societad Arenberg da Düsseldorf. Dapi la fundaziun dallas pendicularas igl onn 1969 eis ella stada igl acziunari principal. La fin zercladur da quest onn ha ella terminau siu engaschament el vitg claustral. La BD Management Holding SA da Marcus Weber ha surpriu la maioritad dallas aczias dalla societad. La BD Management Holding SA ha plinavon remplazzau Thomas Berger sco conacziunari dil hotel Baur. Marcus Weber vul s’engaschar igl avegnir sco delegau dil cussegl d’administraziun dallas pendicularas e sco president dil cussegl d’administraziun dil hotel Baur. President dil cussegl d’administraziun dallas Pendicularas Mustér SA duei Heinz Schumacher restar.

 

Sustegn dil maun public

Sco quei ch’il president dil cussegl d’administraziun Heinz Schumacher ed il vicepresident Thomas Bieger scrivan el rapport annual 2013/14 dallas Pendicularas Mustér SA, ei la finanziaziun dils dus gronds projects da colligiaziun ed ennevar pusseivla mo cun sustegn dil maun public. «La realisaziun dil project d’ennevar en pliras etappas survarga per dabia la forza finanziala dall’interpresa. Sch’il project duei vegnir persequitaus vinavon, drova ei in sustegn marcant dil maun public, en special dalla vischnaunca», puntueschan ils dus exponents dall’interpresa. La medema sort tucca era la colligiaziun da Sedrun cun il territori da ski da Mustér: «Senza ina colligiaziun dil territori da skis dad Andermatt e Sedrun en direcziun Mustér vegnan la Surselva ed il Grischun buca ad obtener impuls da svilup essenzials. En connex cun quei project ei la balla tier las vischnauncas ed ina gruppa d’iniziativa ch’ei aunc da fundar.»

 

Ulteriurs letgs caulds

Igl onn da fatschenta passau han las Pendicularas Mustér SA stuiu nudar in deficit da rodund 280'000 francs. Cun 5,83 milliuns francs ein las entradas stadas per quater pertschien sut quellas digl onn precedent. Perencunter ein las expensas carschidas per 3,5 pertschien sin 5,05 milliuns francs. Il cash flow ell’altezia da 535‘000 francs ei per 46,7 pertschien pli bass ch’igl onn avon. Aschia han las amortisaziuns ell’altezia da struschamein 800‘000 francs buca saviu vegnir cuvretgas. „Il resultat finanzial digl entir onn da fatschenta ei claramein insufficients“, scriva il meinafatschenta Ruedi Büchi. Ultra dalla situaziun malcuntenteivla dall’aura e dalla neiv, han ulteriurs criteris engreviau il quen. Denter auter ei quei stau la midada persunala en differentas posiziuns: «Cheutras ei bia know-how iu a piarder, per exempel el sectur dalla gastronomia.» Il diember da dis da skis ei sereducius per nov pertschien sin 115‘274. Tenor las pendicularas stat quella reducziun era en connex cun la reducziun da sis pertschien dallas pernottaziuns a Mustér: «Ei semuossa ina ga dapli ch’il turissem d’unviern a Mustér ei dependents dils hosps che fan vacanzas cheu.» Medemamein pon ins constatar ch’ils hosps dalla scena da freeride ed ils hosps svizzers reserveschan pli e pli a cuorta vesta e quei sebasond sin las prognosas dall’aura. Sco quei ch’il cussegl d’administraziun dallas Pendicularas Mustér SA menziunescha, ei il project da secundas habitaziuns al Crest d’Acletta aunc adina bloccaus suenter il recuors da Helvetia Nostra. Quei project purtass in tschuppel letgs novs. Il medem mument pudessen ils mieds finanzials recaltgai cheutras survir alla societad per ina finanziaziun parziala dils dus gronds projects da colligiaziun ed ennevar.