News-Details

Era uonn diregia Simon Camartin concerts festivs

22.12.2014

Advent, Nadal e Daniev ei in temps tut special e zun adattau per arranschaments culturals. Dapi plirs onns s’audan ils concerts cun musica classica, dirigi da Simon Camartin da Mustér, denter quels. Era uonn seporschan treis caschuns d’udir ils concerts, numnadamein ad Aschera, Mustér e Falera. Simon Camartin ei era sedecidius uonn per ovras bein enconuschentas che pon fascinar. Leutier s’audan denton era entginas ovras ch’ein stadas meins savens d’udir entochen oz. Cheutras e cun risguard dad ovras da plirs cumponists obtegn il concert ina interessanta mischeida musicala. A Mustér vegn il concert arranschaus cun sustegn dil Forum cultural internaziunal.

Da Strauss entochen Rossini

Denter las ovras meins enconuschentas che vegnan presentadas uonn als treis concerts festivs sesanfla «Abendsterne» da Joseph Lanner (1801–1843). Il cumponist ch’ei naschius a Vienna ei staus fetg productivs. El ha cumponiu tschiens ovras. Siu relasch musical cumpeglia en special valsers, musica populara, saults e marschs. Da siu temps s’udeva Joseph Lanner sper Johann Strauss denter ils megliers dirigents da Vienna. Biars onns ein els dus stai amitgs, mo ein allura era daventai concurrents musicals. La premaudiziun dall’ovra «Abendsterne» ha giu liug 1841 a Vienna, dapi lu ei quei in dils tocs preferi dil publicum ella capitala dall’Austria. Als treis concerts festivs ad Aschera, Mustér e Falera fa quell’ovra mintgamai l’entschatta. Ei suondan ovras da Franz Schubert, Johann Strauss junior, Johann Strauss, Gioacchino Rossini e Jean-Baptiste Arban. D’udir ein ovras sco „Donauweibchen“, „Leise flehen meine Lieder“ en ina versiun cun trumbetta ed orchester, „Una voce poco fa“ ni era „Carnaval de Venise“ per trumbetta ed orchester“ sco era „Wiener Blut“.

Dus solists
Simon Camartin che diregia ils treis concerts festivs ei tut auter ch’in nunenconuschent ella scena dalla musica classica. Dapi onns tgira e promova el la musica contemporana en Svizra ed igl ost dall’Europa. El cooperescha regularmein cun orchesters enconuschents internaziunalmein e ha dirigiu varga 50 premaudiziuns. Simon Camartin concertescha a differents enconuschents festivals da musica ell’Europa ed ell’America latina, mo era el Proxim orient. El ei commember da giurias da concurrenzas da musica internaziunalas e ha obteniu ils davos onns differents premis per siu engaschament musical. El porta denter auter il tetel da docter d’honur dall’Academia naziunala per musica ed art dalla Moldavia. Als treis concerts festivs coopereschan uonn era Duri Cathomen e Chasper-Curò Mani. Duri Cathomen ha entschiet a sunar cornet cun 11 onns e gia dus onns pli tard era el commember dalla Societad da musica Falera. Cun 19 onns eis el daventaus campiun dallas concurrenzas da solo dil Grischun e dalla Svizra orientala. Ils davos 14 onns ha el sunau en differentas formaziuns. Chasper-Curò Mani ha terminau ses studis da musica cun differents diploms. El ei sepresentaus ils davos onns en differentas producziuns d’opera e sco solist da concert. El ei vegnius undraus cun plirs premis, denter auter quel da promoziun dil cantun Grischun. Siu repertori cumpeglia ovras d’opera da differents cumponists. El ei gia sepresentaus en differents loghens en Svizra.

Ils concerts festivs per la fin digl onn han liug sonda, ils 27 da december 2014 allas 20.00 ella baselgia evangelica dalla scola media ad Aschera; dumengia, ils 28 da december 2014 allas 20.00 ella Sala Peter Kaiser dalla claustra a Mustér e gliendisdis, ils 29 da december 2014 allas 20.00 ella Fermata a Falera.