News-Details

Las proximas jamnas sepresenta la Gruppa da teater Mustér alla tribuna

06.01.2015

Dapi gleiti trent’onns sepresenta la Gruppa da teater Mustér praticamein mintg’onn alla tribuna en halla Cons. Ella fa quei oravontut cun cumedias. Ina tala ei era uonn sil program, numnadamein il toc «Nul problem – la renta vegn». La translaziun romontscha da quella cumedia deriva d’Alexi Monn. Sonda proxima ei premiera. Tut en tut vegn il toc presentaus sis gadas.

Scumbegls e tschaguolas
Suenter ch’il president dalla gruppa da teater, Sigisbert Beer ha menau sez reschia plirs onns, ha Christina Bundi surpriu uonn la rolla da reschissura. Suenter esser stada engaschada varga 20 onns onns sco actura sin tribuna, ei quella funcziun per ella ina nova sfida: «En sesez level jeu frequentar il cuors da reschia per il teater d’affons avon enzacons onns. Quei cuors ha lu denton buca giu liug, aschia ch’jeu sundel lu sedecidida d’absolver il cuors da reschia convenziunal avon treis onns.» Quater acturas e tschun acturs stattan a disposiziun ad ella per quei toc cun scumbegls e tschaguolas tut che schloppa. «Nul problem – la renta vegn» ei tenor la reschissura Christina Bundi ina cumedia classica cun embrugls pli u meins senza fin: «Il toc regord empauet vid la cumedia «Schulas e manzegnas» che nus havein presentau avon enzacons onns. En mintga cass empermetta il toc bia divertiment.» Gieri Tschuor ei emploiau mercantil ed ei disoccupaus. Per saver finanziar siu mintgadi retila el da tuttas  rentas e prestaziuns supplementaras per persunas inventadas. Tut para dad ir bein, tochen ch`el survegn viseta digl uffeci social. Ussa ha ei num dir manzegnas e cuglianar tut quei ch’ins mo po per spindrar l’atgna pial. Per che quei gartegi sto era siu sutlocatur, il Beni Appenzeller ed igl aug Otti segidar, libramein ni sfurzadamein. Sa sch‘els damognan quei e tgei manegia atgnamein sia dunna, la Gierina da quei?

Teater era per affons
Schegie che Christina Bundi ha buca saviu absolver il cuors da reschia pil teater d’affons, vul ella tonaton realisar l’idea d’ina gruppa per affons: „En sesez levan nus entscheiver cun ils exercezis igl atun vargau. Quei ei denton buca reussiu, essend che treis da siat affons e giuvenils han la fin finala renunziau alla participaziun.“ Ussa para il project tonaton da reussir. Entuorn miez fevrer entscheiva Christina Bundi cun ils exercezis, las presentaziuns dil toc duein haver liug encunter la fin digl onn da scola. «Il siemi da fundar ina gruppa da teater per affons ei en sesez fetg vegls. Luvrar cun affons en in toc da teater ei enzatgei fascinont, mo era ina scola per la veta per els sezs. Els exercezis e las presentaziuns survegnan ils affons segirtad ch’els san nezegiar silsuenter era en lur veta.» Schebein il project d’uonn resta singulars ni sch’ei reussescha veramein da fundar ina gruppa d’affons persistenta, dependa en emprema lingia digl interess. «Pigl avegnir savess jeu s’imaginar ina gruppa che s’entaupa ina ga per jamna naven digl atun entochen la primavera. En quellas sentupadas savess in toc vegnir exercitaus», di Christina Bundi.

Il toc «Nul problem – la renta vegn» vegn daus sonda, ils 10 da schaner allas 20.00; venderdis, ils 16 e sonda, ils 17 da schaner mintgamai allas 20.00; dumengia, ils 18 da schaner allas 14.00 sco era venderdis, ils 23 e sonda, ils 24 da schaner 2015 mintgamai dallas 20.00. Reservaziuns da plaz per telefon 081 947 50 29.