News-Details

Il restaurant a Caischavedra vegn engrondius e renovaus

19.01.2015

Suenter che las pendicularas ein vegnidas igl onn vargau en possess dalla BD Management Holding SA cun Marcus Weber alla testa, ei vegniu moviment el menaschi, en special quei che pertucca migliurs dall’infrastructura e projects novs. L’intenziun da Marcus Weber ei denter auter da procurar per dapli letgs caulds ed aschia era per ulteriura clientella per las pendicularas. Ina da sias ideas ei in resort da vacanzas niev a S. Catrina. Parallelmein sper igl aquist dalla maioritad dallas aczias dallas Pendicularas Mustér SA, ei Marcus Weber era vegnius en possess dil Hotel Baur. Leu ei medemamein previu d’investar ils proxims onns ed aschia far il hotel che sesanfla ella vischinonza dalla staziun da val dallas pendicularas pli attractivs per vacanzas.

 

Restaurant vegn engrondius

La staziun da muntogna dallas Pendicularas Mustér SA ei aschidadir il center sil cuolm. Cheu sesanfla buca mo il pli grond restaurant dil territori da skis, mobein era ina stizun da sport e localitads ed indrezs pil passatemps. Quella funcziun da center duei il baghetg a Caischavedra era ademplir igl avegnir. Sco quei ch’il directur Ruedi Büchi ha detg sin damonda dall’Agentura da Novitads Rumantscha, eis ei previu d’investar la stad vegnenta rodund 1,7 milliuns francs el restaurant. La part dil sid dil baghetg cun vesta enviers il Glatscher da Medel vegn cumpletada cun in niev restaurant. Cheu vegn purschiu 60 plazs survi. Quei sectur ei ina part per sesezza dil restaurant cun ina purschida à la carte. La construcziun da quella part nova vegn adattada all’architectura dil restaurant baghegiau ils onns siatonta. La part nova che vegn construida sil nivel dil restaurant existent vegn erigida cun lenn. L’architectura cun unda sco quei ch’ella ei da constatar egl intern, vegn applicada era per quella part. La part existenta dil restaurant vegn adattada. La purschida vegn cumpletada cun differents buffets. Ina novaziun dat ei era pertuccont las tualettas. Ellas vegnan installadas en localitads che han surviu entochen ussa sco magasin dil sport-shop, vul dir dretg digl access naven dalla pendiculara el baghetg principal.

 

Entschatta igl avrel

La finamira dallas Pendicularas Mustér SA ei da saver lantschar las lavurs da construcziun per la fin da questa stagiun entuorn miez avrel. Entochen la fin dalla stagiun d’atun duessen las investiziuns esser fatgas ed allura survir a lur intent. En ina emprema fasa duein tuttas lavurs cun immissiuns vegnir liquidadas, aschia ch’il menaschi cun la pendiculara ed in restaurant provisori san vegnir purschi la stad vegnenta als hosps da vacanzas ed indigens. En vesta alla stagiun d’unviern actuala han las Pendicularas Mustér SA surpriu il menaschi dalla Treglia. Da niev vegn offeriu ella «Bargia Catrina» ina purschida d’après-ski. Il local ei aviarts mintga di encunter sera. Tenor Ruedi Büchi vegn giudicau il proxim temps, schebein ins vul porscher in menaschi reduciu era la sera. El Hotel Baur ein las empremas investiziuns fatgas. Duas suitas ein vegnidas adattadas allas pretensiuns dils hosps. El decuors da quest onn duein las migliurs vid il baghetg e la purschida cuntinuar. Denter auter eis ei previu d’engrondir e modernisar la cuschina. Cheu duei era ina part dalla purschida da cuschina per il territori da skis vegnir preproducida igl avegnir. A Lai Alv porschan las pendicularas dapi quest unviern duas rutas novas per ir cun gianellas e da S. Catrina entochen Gendusas seporscha als amitgs da turas la caschun da nezegiar la nova ruta da trenament da turas. La ruta mesira siat kilometers e ha ina differenta d’altezia da 1030 meters. Participontas e participonts da quella ruta d’exercezi san era separticipar ad ina concurrenza che cuoza igl entir unviern. La ruta ei ina buna caschun da sepreparar per la Trofea Péz Ault che ha liug uonn ils 22 da