News-Details

1200 affons e giuvenils al festival da chors a Mustér

19.01.2015

La sentupada da rodund 1200 affons e giuvenils dall’entira Svizra vegn organisada d’in comite local cun sustegn dall’Uniun Festival da chors d’affons e giuvenils dalla Svizra. Igl ei la tschunavla ga che quei festival vegn arranschaus. La davosa ga ha el giu liug a S. Gagl. Per l’emprema ga sespleiga el en territori romontsch. Persuenter dat ei denton buca in motiv special. «La caschun da surprender e d’organisar quei festival ei sedada sin fundament da discuors persunals. Nossa regiun ei vegnida eligida plitost pil motiv che l’uniun leva arranschar quei festival per ina ga ellas muntognas“, di Flavia Walder-Hublard da Sevgein che presidiescha il comite d’organisaziun. Ultra dad ella appartegnan era Christian Klucker, Peter Daniels, Roland Cajacob, Rahel Hohl, Gion Hosang ed Armin Spescha al comite. Sustenius vegn quel d’ina cumissiun da musica cun il president Christian Klucker, Rilana Cadruvi, Vreni Winzeler, Manuela Bühler, Michael Schläpfer e Luzius Hassler.

 

Ina gronda sfida logistica

Il tschunavel Festival da chors d’affons e giuvenils dalla Svizra ha siu center a Mustér. Ils responsabels per quel ein sedecidi pil Center da sport e cultura sco liug da sentupada e per l’organisaziun dils arranschaments principals. Affons, giuvenils, dirigents ed ulteriurs accumpignaders han lur dimora ell’entira regiun, oravontut a Mustér e Tujetsch. La coordinaziun dils transports els loghens da dimora e da concert ei per ils organisaturs ina gronda sfida. «Ils transports succedan cun bus e cun trens specials. Sigl areal dil Center da sport e cultura vegnin nus ad ereger ina gronda tenda, per aschia saver porscher sufficientamein plaz a tuttas persunas per exempel duront gentar», di Flavia Walder-Hublard. Il catering vegn procuraus dalla claustra da Mustér. Il festival ei buca mo organistoriamein ina gronda sfida, mobein era finanzialmein. La sviulta da quella occurrenza sur quater dis ei calculada cun 550'000 francs. Ils fatgs finanzials vegnan procurai directamein dall’uniun svizra.

 

Quater chors grischuns

Ils 36 chors participonts derivan dall’entira Svizra. Denter quels sesanflan era quater dil Grischun: Chors d’affons dalla Surselva cun la dirigenta Rilana Cadruvi, StimmWerkBande da Tumein cun il dirigent Christian Klucker, Chor d’affons dalla Portenza cun las dirigentas Iris Vogt e Tanja Däscher e secapescha il Chor d’affons dalla vischnaunca da Sumvitg cun sia dirigenta e presidenta dil comite d’organisaziun dil festival, Flavia Walder-Hublard ch’ei engaschada professiunalmein sco scolasta da cant alla scola a Glion. Dalla part taliana dalla Svizra havess ella giavischau ina megliera participaziun. Dil Tessin deriva numnadamein mo in sulet chor. Perencunter ein pliras formaziuns d’affons e giuvenils dalla part franzosa dalla partida a Mustér. «Il festival sco tal ei negina concurrenza da cant. El center stattan la sentupada ed il cant», puntuescha Flavia Walder-Hublard.

 

Concert cun 36 chors

Il program da quei festival ei fetg varionts. Ils chors e lur dirigentas e dirigents separticipeschan a luvratoris e concerts singuls e communabels. Mintga sera s’entaupan ils chors ell’arena dil festival el Center da sport e cultura a Mustér. Il di ora vegn exercitau e concertau. Il program preveda concerts en differents loghens. Chors d’affons e da giuvenils embelleschan era survetschs divins la dumengia a Mustér, Sedrun, Sumvitg e Trun. Il punct culminont dalla sentupada ei la sonda sera. Lu contan ils 36 chors da cuminonza il Chorical cul tetel «Die absolute Melodie» ch’ei vegnius cumponius specialmein per quei festival. Il text per quel ha Felix Benesch scret, la musica ei vegnida cumponida da Ludger Nowak. Ei setracta d’in toc cun musica dramatica. El ei cumponius e screts aschia che mintga chor exercitescha ina part. Il toc raquenta la historia dalla mattatscha Ursina da Mustér che anfla in toc crap cun segns nuncapeivels duront ina spassegiada. Ella po lu constatar ch’ei setracta d’in toc musica misterius. Ursina va alla tscherca dils ulteriurs tocs dil crap. Als concerts dalla sera ed al concert principal la sonda sera san ils organisaturs dil festival era risguardar in diember limitau d’audituras ed auditurs. «Damai che bia plaz vegn occupau dils affons, giuvenils ed accumpignaders, savein nus aunc porscher mintgamai rodund 250 plazs», di Flavia Walder-Hublard che diregia dapi prest diesch onns il Chor d’affons dalla vischnaunca da Sumvitg. Il mument dumbra quel 49 mattatschas.