News-Details

Success cumplein cun l’emprema LBM GuggaNight 2015 a Mustér

26.01.2015

“Suenter ina strentga fin d’jamna astgein nus mirar anavos sin ina fetg bein gartegiada emprema ediziun dalla LBM GuggaNight, nua che nus havein astgau beneventar rodund 740 visitaders.” di Roman Beer, president da Las Bagordas.
“Tut las musicas da tscheiver dalla bassa han anflau la via a Mustér, malgrad ch’ei ha dau rodund miez meter neiv la sonda endamaun. Negins ein setschentai vi Andermatt, solisulet in chauffeur ha stuiu semenar el tunnel da Mumpé Medel”, di Fabian Manetsch, ch’ei responsabels per las musicas da tscheiver ed il program digl event.
“Cunzun las duas musicas „Schlossbärghüüler da Laufenburg“ e „Steibruchschränzer da Würenlingen“ han pudiu perschuader il publicum e procurau per ina buna atmosfera.”
Duront l’entira sera ein 10 musicas da tscheiver sepresentadas sin tribuna. Ultra dalla sera ein entginas musicas era sepresentadas el territori da skis. “Cunzun il panorama da nos bials cuolms ha caschunau per in effect da WOW e vegn a restar allas guggas en buna memoria.”
“L’organisaziun digl event ha funcziunau fetg bein – nos commembers e nos gidonters han prestau fetg gronda lavur.” di Manuel Flepp, responsabels per l’infrastructura e segirtad. “Era essan nus leds ch’ei ha buca dau accidents ni incaps da segirtad”.
Duront la LBM GuggaNight havein nus registrau ils concerts dallas musicas da tscheiver. Quellas vegnan publicadas proximamein sin nies canal da YouTube.
“Per Las Bagordas cuntinuescha il tscheiver uss ella regiun. Il secund punct culminont dilgiubileum da 30 onns ei il tscheiver a Mustér, che la liug sonda, ils 14 da fevrer 2015. Sper igl usitau til da tscheiver astgan ils visitaders dalla sera da divertiment selegrar sin in concert da giubileum da mesa notg.” aschia il president Roman Beer.