News-Details

Vid la fuortga cun la politica

17.02.2015

La seduta dalla Dertgira nauscha da gliendisdis tscheiver a Mustér ha giu liug uonn per la 27avla ga senza interrupziun. Igl onn 1989 era ella vegnida reintroducida suenter ch’ella haveva giu fatg pausa duront rodund dus tschentaners. Pli baul gudeva il tribunal local dil tscheiver ina gronda calamita. Probablamein era la dertgira vegnida abolida a sias uras suenter l’invasiun dils Franzos. Uonn han las duas derschadras Tina Bundi ed Anna-Maria Genelin ed il derschader Gion Hosang preligiu las tractandas e sentenzias dalla dertgira che ha giu liug sin la plazza da scola.

Stratscha e punts

Dominau las tractandas dalla Dertgira nauscha d’uonn ha la politica, respectivamein las ovras da quella. Capeivlamein che las bandieras alla staziun ein stadas in dils temas. Per il tribunal eis ei clar, tgei messadi che la vischnaunca vul dar cun quellas: „Nus essan tuts fanas“. Il medem vali per la Dertgira nauscha. Ina ga mondien las sentenzias cul vent, in’autra ga dretg ed in’autra ga seniester, anavon ed anavos. Plascher special sto la dertgira haver dalla punt planisada sur Raveras vi. Ei detti bunas raschuns da baghegiar quella: «Per ir cun las nuorsas suravi enstagl atras Raveras ni per porscher dapli frequenzas alla baselgia reformada. Lu stuess ei denton vegnir erigiu leu in ascensur. La punt porscha denton era occupaziun alla sfraccada luvrers dil survetsch tecnic dalla vischnaunca.» La Dertgira nauscha constatescha medemamein, ch’ei vegn baghegiau a Mustér habitaziuns senza fin, quei surtut dapi ch’ins astga buca pli baghegiar secundas habitaziuns. Il tetel da cavalier d’honur dil stab da tscheiver da Mustér ei vegnius surdaus al menader dalla posta. Quel hagi constatau ch’ils spurtegls seigien cheu per esser aviarts.

Gastronomia e turissem
La gastronomia ha la grippa dil magun. La Dertgira nauscha ha pudiu eruir che «gaster» vegn dil grec e munta magun. Mo aschia sappien ins declarar daco ch’ils gastronoms sappien serrar jamnas ed jamnas lur ustrias ed esser circa aschi innovativs sco l’aura dalla stad vargada. Tut auter seigi quei tier ils gastronoms novs dil vitg – la claustra. Ina soluziun ha la dertgira era per Sedrun Mustér Turissem. Dapi onns vegni ei mo sestratg, ils directurs viseschien lur plazzas bunamein avon che surprender quellas. La Dertgira nauscha ei dil meini da regalar SMT alla Nasa. Lezza savessi duvrar l’organisaziun per in test da rachettas e sittar lunsch, lunsch naven. La fin finala sa la dertgira era che la protecziun da monuments savess vegnir vonzeivi sin l’idea da proteger il Hotel Acla da Fontauna. El duei restar ina perdetga ch’ei mavi bein pli baul cul turissem. Il giubileum da 1400 onns dalla claustra ha medemamein buca muncau ellas tractativas dalla Dertgira nauscha. Midadas dall’infrastructura e dalla structura persunala seigien la consequenza. Per quei ch’il statalter fagevi pli baul persuls, seigi ina direcziun cun sis persunas ussa necessaria.

Semetter els stadals

La Dertgira nauscha cusseglia allas autoritads politicas da semetter els stadals, l’auter onn seigien elecziuns. Co ei sappi ir muossi igl exempel da Tujetsch. La magra preschientscha allas sedutas dil cussegl da vischnaunca, las mesiras da spargn, mo era igl alzament dallas taxas turisticas e per la canalisaziun e serenera ein stai temas dalla dertgira. Ella ei segira ch’il referendum encunter igl alzament dallas taxas ei gia ussa programaus. La Dertgira nauscha ha era analisau il menaschi dil Center da sport e cultura. Ei drovi leu in menader en plazza cumpleina per administrar las clavs, ina lavur hanada. Novitads ha la Dertgira nauscha era pertuccont il «Dschungelcamp» da RTL. 2017 seigi quel previus a Mustér ella plontaziun dil Center da sanadad Puntreis. La fin finala ei la dertgira vegnida alla conclusiun che la politica stoppi vegnir pendidada. Ella seigi la cuolpa per la ruosna – denter auter ella cassa communala – che daventi adina pli gronda. La tschentada dalla Dertgira nauscha ei vegnida embellida musicalmein da Las Bagordas e da Las Fifferlottas. Medemamein han las derschadras ed il derschader interrut la seduta cun ina canzun davart la ruosna. Manegiada ei danovamein quella ella cassa communala.