News-Details

Surbaghegiada cun hotel e habitaziuns

26.02.2015

Nova damonda da baghegiar

Plirs onns ei la societad Due Santieri sefatschentada digl areal cun la finamira da realisar leu ina surbaghegiada cu hotel, habitaziuns administradas e secundaras. Persuenter haveva ella era in dretg da precumpra digl areal che s’auda alla Banca cantunala grischuna. Ina damonda da baghegiar per siu project ei denton mai vegnida inoltrada alla vischnaunca. Ussa ei la Societad da svilup dil project Acla da Fontauna, representada entras il giurist Jon Andri Moder da Cuera, lundervi da far ponderaziuns concretas da realisar sin quei areal ina surbaghegiada. Il project che la vischnaunca ha obteniu en fuorma d’ina damonda da baghegiar cumpeglia in hotel, habitaziuns administradas ed ulteriuras habitaziuns. Concretamein setracta ei da 100 combras da hotel cun totalmein rodund 300 letgs, 22 habitaziuns administradas e 56 habitaziuns secundaras.

 

Ina preexaminaziun

Tenor informaziuns dil president communal Francestg Cajacob corrispunda il project alla planisaziun d’areal Acla da Fontauna. Las proximas jamnas vegn la cumissiun da baghegiar a sefatschentar dil project: «Quel ei relativamein cumplex e per quei motiv ei ina preexaminaziun necessaria.» Silsuenter duei la damonda da baghegiar vegnir publicada. Il crap da scarpetsch che Francestg Cajacob vesa il mument, ei la surcapacitad da habitaziuns: «Dapi che l’iniziativa concernent il stop da secundas habitaziuns ei vegnida approbada, ein aunc fetg biaras habitaziuns vegnidas baghegiadas.» Davart ils cuosts dall’entira surbaghegiada vegn fatg neginas indicaziuns. Suenter che la lubientscha da baghegiar ei avon maun, vegn la societad a tschercar investurs sco era in administratur per la surbaghegiada ad Acla da Fontauna.

 

Pliras emprovas

Il Hotel Acla da Fontauna ei vegnius erigius ils onns dil grond svilup turistic a Mustér. L’entschatta dils onns 1970 ein numnadamein era las pendicularas vegnidas baghegiadas ed ellas han dau speronza als investurs. Dapi il zercladur 2001 ei il Hotel Acla da Fontauna a Mustér vits. Avon ch’ils davos hosps beltgs bandunien quei object cun rodund 600 letgs e lu aunc en possess dad Arnold Mathis, ei vegniu fatg differentas emprovas d’occupar vinavon el. Ils davos onns avon ch’il contract cun la Intersoc spireschi, han differents discuors giu liug. L’Intersoc ha la fin finala buca vuliu prolunghir il contract. Discussiuns cun autras societads han medemamein buca giu il resultat giavischau. L’Intersoc ei stada rodund 30 onns affittadra dil hotel ad Acla da Fontauna. Dapi ch’il hotel ei serraus, han denton era differentas societads demussau interess per il baghetg, respectivamein igl areal. Aschia ein plirs projects vegni elavurai. Denter auter ei era ina varianta cun participaziun dalla vischnaunca stada sin meisa avon biebein diesch onns. Quella cumpigliava la cumpra dil hotel entras la vischnaunca e las pendicularas e silsuenter ina sanaziun dil baghetg. Il project prevedeva ina contribuziun anticipada dall’Intersoc sco tscheins unic per 17 onns. Cun quels daners havess il hotel saviu vegnir sanaus ed il menaschi garantius per ils proxims rodund 20 onns. Quella varianta ha fatg naufragi sco differentas autras era. La fin finala ei vegniu enconuschent avon rodund tschuns ch’ina nova societad cul num Due Santieri vegli realisar ad Acla da Fontauna in hotel da cultura e sport, sco era habitaziuns secundaras. Sin fundament da quei project ei allura vegniu realisau in plan d’areal che ha aunc adina vigur. Il Hotel Acla da Fontauna sesanfla gest sper il Center da sport e cultura. El ei denton era ella vischinonza dalla staziun da val dallas Pendicularas Mustér SA e d’ina staziun dalla Viafier Matterhorn Gottard.