News-Details

Gleiti negina Sibla e Dertgira nauscha pli?

02.03.2015

L’Uniun da tscheiver Mustér ei vegnida fundada 1984. Sut sia egida sespleiga dapi lu il til da tscheiver atras il vitg. L’uniun coordinescha denton era onn per onn l’organisaziun dalla gronda sera da tscheiver el Center da sport e cultura. Ella ei denton era la responsabla per la gasetta da tscheiver «La Sibla» e 1989 ha ella reactivau la Dertgira nauscha. La purschida dall’uniun da tscheiver vegn appreziada, quei demuossa igl interess ton per la gasetta sco per il til ed oravontut la Dertgira nauscha ch’ei singulara en sia fuorma. Quels arranschaments han procurau ils davos treis decennis per in tschec moviment sil sectur dil tscheiver sisum la Surselva ed attilan onn per onn fetg bia glieud, era d’ordeifer la vischnaunca da Mustér.

Basegns da nova energia

L’Uniun da tscheiver Mustér dumbra il mument rodund 30 commembras e commembers. «Plirs da quels ein dapi fetg biars onns ell’uniun e han prestau bia lavur en quei temps. Capeivel ch’in ni l’auter ei buca pli promts da segidar. Ils davos onns ha ei adina tuccau ils medems cu ei ha giu num luvrar», di Gion Hosang ch’ei dapi nov onns commember da suprastonza e dapi tschun onns president dall’uniun. Las preparativas per il tscheiver ein ina dallas grondas incumbensas dall’uniun. L’autra ei la lavur intensiva duront ils treis dis da tscheiver a Mustér: «Quella purschida pretenda in engaschament extraordinari ed jeu haiel tutta capientscha per quellas e quels che vulan semplamein guder quels dis en ina fuorma empau pli ruasseivla.» Ultra dallas commembras e dils commembers dall’uniun segidan era adina puspei auters vischins vid las lavurs dil tscheiver. Ils 28 da matg 2015 salva l’uniun sia radunonza generala. Dalla suprastonza seretila Renata Gadola ed ella sto vegnir remplazzada. «Entochen lu vegnin nus a veser tgei effect e tgei resun che nies inserat ha. Sch’ei reussescha buca d’animar ulteriuras persunas da s’engaschar ell’uniun en favur dil tscheiver, stuein nus mirar co cuntinuar. Igl avegnir sto ei esser pusseivel da reparter tut quella lavur sin pli biaras schuialas“, declara Gion Hosang. Igl ei schizun pusseivel che l’uniun vegn dissolvida cun occasiun dalla proxima radunonza generala.

Negina gasetta igl avegnir?
Il president spera ch’il scenari da stuer dissolver l’uniun daventi buca realitad. Sche quei succeda tonaton ein ton la gasetta da tscheiver «La Sibla» sco la Dertgira nauscha effectivamein periclitadas da svanir: «Ellas duas dattan segiramein il bia lavur. Igl ei in engaschi ch’entscheiva gia ditg avon il tscheiver. Tier la gasetta constatein nus il mument che negin ei promts da scriver enzatgei e tier la Dertgira nauscha havein nus adina puspei difficultads d’anflar derschadras e derschaders.“ Perencunter vesa Gion Hosang la pusseivladad ch’il til da tscheiver e la sera da tscheiver savessen vegnir menadas vinavon sco entochen dacheu: „Jeu savess s’imaginar che las musicas da tscheiver fussen eventualmein promtas da cuntinuar cun quels dus elements dil tscheiver. Igl ei pusseivel d’arranschar quels era senza l’uniun.“ Schebein l’uniun po vegnir salvada la fin da matg vegn pia a semussar ils proxims treis meins. „Cun nies inserat ellas gasettas lein nus far attents, ch’ei dat negin tscheiver senza engaschi. Forsa gida quei appel ad anflar persunas che vulan s’engaschar. Sche buca, eis ei clar ch’igl interess ei buca avon maun e ch’ei emporta era buca sche las purschidas da tscheiver dall’uniun svaneschan“, constatescha Gion Hosang.