News-Details

Concerts da Mustér entochen a Cologna

10.03.2015

«Nus lein esser singulars sco la regla da s. Benedetg», di il rectur dil gimnasi dalla claustra, Bruno Hensler. La turnea d’uonn dil chor ei singulara. Buca mo en sia dimensiun, mobein era pervia da siu messadi. «UT UNUM SINT» - ch’els (ils carstgauns) seigien units – ei il num dalla turnea d’uonn. Las preparativas per quella han cuzzau biebein dus onns: «Nus havein buca mo giu da sepreparar musicalmein, mobein era da sefatschentar dallas sfidas logisticas che pertuccan quei grond project», di il rectur ch’ei era al tgamun dall’organisaziun.

Dil Rein giuadora
La turnea cumpeglia otg concerts. Igl emprem ha liug sonda proxima ella baselgia claustrala a Mustér. Dumengia suonda il concert a Cuera, sonda e dumengia sissu a Turitg e Basilea. Da leu serendan las scolaras, ils scolars, magisters e hosps sin bastiments e concerteschan ils dis suandonts a Breisach, Speyer, Mainz e la fin finala a Cologna venderdis, ils 27 da mars 2015. «L’entira jamna da concert en Germania vivin nus sin bastiments. Nus havein saviu reservar dus cun plazs per mintgamai 150 persunas. Ensemen cun ils concerts en gronds ed impurtonts loghens dalla Germania ei quei segiramein in eveniment singular», di Bruno Hensler. Singulara ei la turnea en plirs graus: «Da miu saver ha ei aunc mai dau ina tala turnea d’ina scola en Svizra. Igl entir gimnasi, inclusiv hosps, ei sin viadi duront in’jamna cun bastiment e concertescha pliras ga. Plinavon ha la constellaziun che sepresenta al gimnasi il mument possibilitau quei project.» Cun quella constellaziun manegia Bruno Hensler oravontut las resursas persunalas dil gimnasi. Leutier s’auda aschi bein l’innovaziun sco era las qualitads dil dirigent Clau Scherrer. La turnea duei denton era haver in effect da propaganda. «Naturalmein che nus lein era mussar tgi ch’il gimnasi ei e che nossa scola sesanfla el territori dalla tgina dil Rein. Il Rein ei numnadamein ina noziun per biars Tudestgs.» La turnea pretenda engaschament cumplein ellas preparativas musicalas, mo era organisatorias. La gronda part dalla lavur dil team d’organisaziun ei vegnida e vegn prestada el temps liber. Il project ei calculaus cun cuosts da rodund in miez milliun francs. Sustegn persuenter obtegn il gimnasi da differentas organisaziuns ed instituziuns.

Messadi dalla pasch

Il project «UT UNUM SINT» fuorma buca mo la turnea dil chor d’uonn, mobein era la finiziun dallas festivitads da giubileum da 1400 onns dalla claustra da Mustér. La turnea stat denton era en connex cun la pasch. 70 onns ein passai dapi che la secunda uiara mundiala ei vargada. L’entschatta dil project ei vegnida fatga miez settember 2014 cun l’excursiun alla tgina dil Rein. Las proximas duas jamnas vegn quei viadi sil Rein cuntinuaus. Els otg concerts previ naven da sonda proxima presenta il Chor claustral la cumposiziun «UT UNUM SINT» da Lorenz Dangel. Quella consista da siat parts. Integradas ella cumposiziun vegnan era las melodias dils zenns dalla claustra. «UT UNUM SINT» ei il segn per la pasch, mo era l’inscripziun d’in dils zenns dalla claustra da Mustér. Quei zenn ei vegnius culaus en vesta alla midada dil millenni e ha tuccau l’emprema ga da Silvester 1999. Il «Magnificat» per papa Francestg dad Ursin Defuns vegn orchestraus da niev ed adattaus al chor. La musica ei moderna ed archaica, scretta per dus chors - Chor claustral e Chor deCanto – per igl Orchester Desertina e las solistas Letizia e Judith Scherrer. La direcziun dils concerts ei els mauns da Clau Scherrer. Duront l’jamna da turnea sil Rein absolvan las studentas ed ils students era differents workshops. Denter auter vegn priu mintga di emprovas dil Rein, per aschia puder endriescher dapli dalla qualitad dall’aua. La viseta dils marcaus e d’edifecis specials s’auda medemamein tiel program. Scolaras e scolars che contan buca el chor repartan fegls d’informaziun els marcaus cun concerts dil Chor claustral. Il viadi cun ils dus bastiments dil Rein giuadora ei per part la notg.

Ulteriuras informaziuns: www.ut-unum-sint.ch.