News-Details

La Banca Raiffeisen Cadi sa presentar in bien onn da fatschenta 2014

27.03.2015

En vesta alla radunonza generala dalla banca venderdis, ils 10 d’avrel 2015 el Center da sport e cultura a Mustér, presentan il cussegl d’administraziun e la direcziun il rapport annual. La Banca Raiffeisen Cadi dumbra il mument 4671 commembras e commembers. Quei diember ei sesminuius levamein igl onn vargau. La banca ei activa sigl intschess dallas vischnauncas da Medel, Mustér, Sumvitg, Tujetsch e Trun. Sper la sedia principala a Mustér porscha ella era ses survetschs a Curaglia, Sedrun, Sumvitg, Surrein e Trun. Sia cumpetenza da coc e fontauna principala d’entradas ei la fatschenta da tscheins, pia la recepziun da daners ed igl emprest da tals, principalmein en fuorma da hipotecas. Per la fin digl onn occupava la banca 22 persunas, da quellas duas emprendistas ed in emprendist. Il volumen da lavur munta a 16,3 plazzas cumpleinas. Il cussegl d’administraziun dalla banca vegn presidiaus da Gion Battesta Manetsch. Commembers da quel ein Giusep Bearth, Vigeli Jacomet ed Emil Pally. La direcziun dalla banca ei els mauns d’Alfons Quinter.

Dapli hipotecas
Igl onn da fatschenta 2014 siara la Banca Raiffeisen Cadi cun in gudogn annual da 490'000 francs. El ei per 2,2 pertschien sur quel digl onn avon. Il gudogn brut dalla banca munta a 3,4 milliuns francs. Quel ei per 0,6 pertschien pli aults che 2013. «Quei augment demuossa la gronda efficienza da nossa banca e la buna situaziun finanziala che reflectescha la confidonza da clientas e clients enviers nos survetschs. Cun il gudogn realisau savein nus rinforzar il capital agen. Era suenter l’aboliziun dall’obligaziun d’in pagament supplementar e las rescas reducidas per il singul commember propona il cussegl d’administraziun alla radunonza generala da tscheinsir la quota da fatschenta cun sis pertschien», scriva la banca en siu rapport annual gest cumpariu. La Banca Raiffeisen Cadi ha saviu defender sia ferma posiziun sin la fiera da hipotecas. Sin quei sectur registrescha ella in carschament da 3,3 pertschien. Il total dils emprests a clients munta 423,5 milliuns francs. «Quei resultat duei buca zuppentar che mintga client vegn analisaus da rudien a basa individuala tenor directivas rigurusas. La qualitad da nies portfolio da credits ei perquei vinavon excellenta», puntueschan cussegl d’administraziun e direcziun dalla banca el rapport annual. Praticamein ella medem dimensiun ei il volumen da daners da clientella carschius, numnadamein per 4,2 pertschien. Ils deposits da clients han contonschiu cheutras la summa da 356,3 milliuns francs. „En vesta al nivel da tscheins fetg bass ei la restructuraziun da daners ord obligaziuns da cassa en daners en fuorma da daners da spargn buca exnum surprendenta“, scriva la banca.

Tscheins ein ina sfida
Il gudogn ord la fatschenta da tscheins ha saviu vegnir augmentaus per 0,6 pertschien sin 6,3 milliuns francs. Ella contribuescha 90,4 pertschien dil recav brut. «Il nivel da tscheins bass e la marscha da tscheins fetg stretga ein per nus ina sfida. La finamira ei da reducir la dependenza dalla fatschenta da tscheins e da diversificar las entradas. Aschia augmentein nus la purschida ella fatschenta da cussegliaziun da finanzas e per la clientella da fatschenta», scrivan ils organs dalla Banca Raiffeisen Cadi. Il gudogn dalla fatschenta da cumissiuns e survetschs ei carschius per pressapauc nov pertschien sin 285‘000 francs. La Banca Raiffeisen Cadi ha analisau la structura da cuosts. Da quella examinaziun ein sedadas differentas pusseivladads da respargn. Ils cuosts da fatschenta han saviu vegnir sbassai per 2,9 pertschien sin struschamein 3,6 milliuns francs. Ferton ch’ils cuosts da persunal ein carschi per in pertschien sin 2,1 milliuns francs, ein ils cuosts per material sesminui per buca meins che 8,3 pertschien sin 1,4 milliuns francs. La summa da bilanza dalla banca ei carschida per 4,1 pertschien sin rodund 470 milliuns francs.