News-Details

Alla tscherca da voluntaris pil festival da chors d’affons e giuvenils

08.04.2015

Sco quei ch’il responsabel pil persunal, Gion Hosang di, ei l’organisaziun aunc alla tscherca da rodund 40 persunas. «Nus tscherchein il mument aunc 20 guids per ils chors. Lur funcziun ei d’accumpignar mintgamai in chor dalla gievgia da miezdi entochen la dumengia suenter miezdi e da procurar che quel vegni mintgamai el dretg liug. Plinavon mauncan a nus aunc 20 persunas responsablas per ils dormitoris dils chors. Lur funcziun ei d’esser la damaun el camp ed oravontut da porscher il solver. Ils dormitoris sesanflan el contuorn da Mustér entochen Selva en Val Tujetsch. Quellas persunas havessen in engaschament mintga damaun dallas siat entochen rodund las nov.» Gion Hosang spera ch’ei reusseschi d‘anflar quellas persunas ils proxims dis: «Per Mustér e contuorn ei quei festival ina grondiusa schanza dad esser per quater dis el center dalla musica da chors ed el focus dallas medias.“

 

Ina gronda sfida

La sentupada da rodund 1000 affons e giuvenils – respectiv 36 chors – vegn organisada d’in comite local cun sustegn dall’Uniun Festival da chors d’affons e giuvenils dalla Svizra. Per l’emprema ga sespleiga quei festival en tiara romontscha. Presidenta dil comite d’organisaziun ei Flavia Walder-Hublard da Sevgein che diregia dapi biars onns il Chor d’affons dalla vischnaunca da Sumvitg. Al comite appartegnan era Christian Klucker, Peter Daniels, Roland Cajacob, Rahel Hohl, Gion Hosang ed Armin Spescha. Sustenius vegn quel d’ina cumissiun da musica cun Christian Klucker, Rilana Cadruvi, Vreni Winzeler, Manuela Bühler, Michael Schläpfer e Luzius Hassler. Il festival ha siu center a Mustér. Las activitads principalas sespleigan el Center da sport e cultura. Ina dallas grondas sfidas dall’organisaziun ein ils transports els loghens da dimora e da concert. Quels duein succeder cun bus e cun trens specials. Il festival ei denton buca mo logisticamein ina gronda sfida, mobein era finanzialmein. La sviulta da quei arranschament sur quater dis ei calculada cun biebein miez milliun francs.

 

La vendita ha entschiet

Ils 36 chors participonts derivan dall’entira Svizra. Denter quels sesanflan era quater dil Grischun: Chors d’affons dalla Surselva, StimmWerkBande da Tumein, Chor d’affons dalla Portenza e secapescha il Chor d’affons dalla vischnaunca da Sumvitg. Il program da quei festival ei fetg varionts. Ils chors e lur dirigentas e dirigents separticipeschan a luvratoris e concerts singuls e communabels. Mintga sera s’entaupan ils chors ell’arena dil festival el Center da sport e cultura a Mustér. Il di ora vegn exercitau e concertau. Il program preveda concerts en differents loghens. Chors d’affons e da giuvenils embelleschan era survetschs divins ella regiun. Il punct culminont dalla sentupada ei la sonda sera. Lu contan ils 36 chors da cuminonza il Chorical cul tetel «Die absolute Melodie» ch’ei vegnius cumponius specialmein per quei festival. La vendita da bigliets entscheiva quest’amna tier Sedrun Mustér Turissem.

 

Persunas che vulan s’annunziar per in engaschament duront il festival da chors san s’annunziar tier Gion Hosang, 079 690 97 42 ni per e-mail gion@remove-this.hosangs.ch entochen ils 14 d’avrel 2015.